 |
| 晚飯後精神返 |
條條都係掘頭路, 見唔到奇蹟, 好灰啊!
琴晚同Ka會面, 談及豆b, 佢分享咗佢狗狗之前嘅情況, 都係超聲波下發覺膽有沉澱物, 兼且膽嘅size有輕微脹咗; 但食咗Dr. Fan開嘅利膽藥, 再加上順勢療劑利膽配方, 依家膽嘅問題好返晒, 佢好想豆b都有咁好效果, 叫我再試吓用西藥; 唔用其他嘅藥, 淨focus喺利膽藥, 但求幫到最重要嗰環!
思前想後我都想有個希望, 我都想豆b有多一個support嘛!
今早起身預備早餐, 豆b跟貼我, 似乎好想食嘢咁樣, 可能停咗兩日西藥, 豆b胃口無受到咁大影響啦!
放低佢碟雞肉, 好快食晒, 我再用針筒餵菜同鮮淮山, 佢都好乖, 好合作吞得好快!
我開始猶豫究竟好唔好餵Dr. Fan 開嘅利膽藥, 見佢精精神神又好胃口, 真係唔想破壞呢個咁好嘅氣場!
但未試過用單一藥劑, 又唔心熄, 可能佢接受到呢隻藥, 咁都多一個希望嘛, 先將藥嘅份量減半, 再試吓!
豆b早上8點食半個份量嘅利膽藥, 無皮膚痕無尖叫, 但完全在昏睡狀態, 我叫佢都無力抬頭望望!
一直到中午時間, 佢好似瞓醒喇, 但唔食午餐, 左氹右氹佢食咗入口, 條脷都好似硬晒呔, 從嘴邊跌番晒 :'(
好desperate, 想喊 :(
我要點做先啱, 真係無路可行??????
 |
| 瞓瞓瞓, 一直瞓 ... |
下午同V傾電話, 呢個好朋友過去一直支持我, 我需要多個意見啊!
佢覺得我嘅選擇正確, 認為小朋整日昏睡係大問題, 連食都無興趣梗唔得啦, 既然豆b接受唔到西藥, 唔好勉強喇; 我已經睇過4個獸醫, 但對豆b幫助唔大, 主要都係佢對西藥有不良反應太大喇; V覺得以後唔需要再睇獸醫, 唔好再驗東驗西喇, 反正我唔會揀做任何手術, 而藥物又唔夾, 呢條路唔適合豆b行, 何必攪到大家壓力咁大, 豆b一定feel到我嘅失望喇!
每次見完醫生我都好down, 所得嘅消息都係壞, 但又無辦法幫到, 叫我點放開啊?
老公叫我要放開唔好咁擔心啦, 阿女叫我唔好希望咁大, 朋友叫我要正能量, 大家都怕我會冧啊!
我係緊張, 但我堅強, 我會硬撐!
到咗晚餐時間, 豆b肯食喇, 可能藥力過咗, 佢無咁攰啦, 我唔知我做嘅啱唔啱, 但我唔想佢咁辛苦, 或者只識瞓覺; 希望豆b有正常嘅生活, 可以玩, 可以食, 即使係短時間!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
