過去嘅48小時, 好絕望, 心情直跌谷底, 個人失晒方向!
豆b似乎係唔適合用西藥, 佢食西藥呢個星期以來, 精神差咗, 整日瞓到昏昏沉沉; 呢個情況我早預料, 雖然有D不安, 但未至於驚, 權衡輕重當然要先保命!
但...豆b早兩日叫得好悽涼, 仲渾身發燙, 皮膚紅卜卜, 一日大概有3, 4次咁樣; 每次我安撫佢噴magic mist再照E-Acu, 可以暫時舒緩咁可怕嘅狀況!
老實講見到佢咁唔舒服, 團團咁轉個心好亂, 究竟係痕定痛? 誘因係邊一點? 叫自己定下心神, 仔細回想!
 |
| Video :豆b慘叫 |
呢幾日除咗新加上餵西藥, 一切如常, 咁會唔會佢身體對西藥排斥, 到一個定點就從皮膚去釋放?
阿女話藥物敏感嘅反應會等咁多日? 佢心生疑竇, 話值得商榷!
但回想兩年前, 豆b頸痛接受西藥治療, 服藥後個多月都長出幾個腫瘤, 停藥後慢慢自動消失, 咁又點裁斷? 作何猜想?
我有問過Dr. Fan, 佢叫我自己衡量個嚴重性, 理皮膚敏感還是要先照顧腎、膽同肝? 醫生嘅角度當然係著重個症狀!
命運要比我挑戰, 可能上天見我講得洒脫, 要比我一個考驗, 當事到臨頭我會點?
我一直講, 生命長短唔重要, 有生活質素行先, 如果要受痛苦何防做個了斷; 年前姐姐嘅遭遇, 拖住沉重嘅癌病去接受化療, 實在令我對生命長短嘅睇法有改變, 但原來要做一個抉擇, 仍係一個好大嘅考驗!
就如一個末期嘅癌症病人, 去接受化療, 過程痛苦, 旁人會慨嘆何苦對塵世咁留戀? 每日活著嘅日子都係痛苦煎熬, 重覆又重覆打化療, 精神肉體受傷一遍又一遍😭！
我嘅比喻其實好貼切, 豆b嘅情況都係要我去選, 我唔確定係咪西藥令佢咁難受, 但都選擇停藥先, 要忍受全身皮膚痕癢, 有如比萬隻蟻咬嘅感覺點頂到先?
原來繼續與否係不由得我去打算, 現實逼我面對呢個兩難嘅局面 😥
呢個都係一個痛苦嘅煎熬, 比一隻蚊咬都痕癢難當, 長時間全身痕癢, 已經無生活質素可言; 咁究竟應否比佢繼續用西藥治療? 繼續用對佢嘅病又有幾多%嘅勝算?
 |
| 停藥後係較精神, 亦無再叫! |
琴日已經停西藥, 只繼續用順勢治療, 暫時仲未聽到佢嘅尖叫!
我應該一隻一隻西藥咁去試驗? 搵出邊隻藥導致佢敏感, 剔除後繼續加埋西藥去治療, 還是要一刀切?
要回一回氣, 心神皆亂, 如果站喺旁人嘅角度, 我會放棄西藥治療, 但一想到咁可能會同可愛嘅豆b更早分別, 我又輾轉難眠, 眼淚濕晒枕邊!
 |
| 明顯對呢兩隻豬少咗照料, 達達無聊自己瞓覺, 波波無奈嘅眼神盡顯 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
