2017年9月12日星期二

有無運到

感覺波波唔開心, 活動少咗, 成日靜靜咁坐, 胃口都差咗!
檢查過佢眼仔大少無改變, 眼白亦無紅, 咁我估應該係佢睇得唔清楚, 雖然未至於睇唔到, 個但一定好矇, 所以信心欠奉; 面對呢個改變, 都要比時間佢過渡, 希望乖仔可以好快適應到!

以我認知白內障應該係循序漸進, 一年前專科仲話佢只係晶體老化, 視力好好, 突然變得咁差, 其實我好心痛亦難接受到; 如果我早D知道, 早D用NAC類眼藥水, 有無可能幫到?

雖然醫生話要解決白內障只有手術, 我其實都知道嘅, 不過我唔敢博呢鋪; 專科就一定係focus喺佢專門課題上, 但個仔嘅整體健康我都要關顧 ; 唯有亡羊補牢, 用NAC眼藥水同castor oil, 網上嘅feedback仍比我一絲希望, 雖然結果好渺茫, 但除咗咁我仲有乜嘢可以做?

睇過好多好評, 話用呢類眼藥水真係可以幫到, 仲有castor oil, 但要有恆心長期去做, 大概要6-8個月成果先可以見到; 我已經無嘢可以輸, 何妨押一鋪?
大前題只要波波對呢隻藥無敏感, 眼仔接受到, 呢個只係補充養份, 屬抗氧化成份, 亦有預防發炎作用, 用一段時間睇睇幫唔幫到啦!
我唔係醫生, 我亦無遵從醫囑, 我祗係用媽媽嘅角度, 以個仔嘅福祉為大前題, 或者你覺得我咁做好愚蠢, 睇專科又唔跟到足😅.

當然我認同醫生嘅講法, 如果唔選擇手術就要確保眼仔無發炎, 預防勝於治療, 要用藥作保護; 但醫生開嘅藥令我有疑慮, 波波一向對西藥敏感, 長用消炎藥又怕影響肝腎酵數高!

上網google呢隻藥嘅副作用,可能導致視力模糊, 二次白內障, 眼壓升高, 玻璃體剝離, 上皮細胞破裂, 角膜變薄, 角膜侵蝕, 角膜潰瘍或角膜穿孔, 呢D都可能威脅到, 雖然未必會遇到, 但我睇咗好不安, 唔敢用😓!
都係偏向用順勢療劑作保護, 最怕顧得頭又傷咗腳, 到時一樣冚一樣, 好似骨牌效應全面倒, 之前湊叻叻嘅經歷比咗我警號!
既然有咗決定, 唔再三心兩意, 就比D耐性等吓有無運到, 但願波波保得住眼仔無發炎就好!

眼仔我無能為力做得更好, 但其他issue更要好好照顧, 日常保健繼續做, 照紅外線, E-Acu...希望最少保得住佢筋骨方面無痛苦!

然後就係佢嘅蛋白尿, 琴日拎咗波波小便去化驗, 今日診所比咗我報告, 係非常好, 同上次比較有好大進步, 已經正常番晒!
不過, 我無得意忘形, 叫自己保持冷靜, 平常心面對就好, 呢D醫療問題可以上落好大, 都未知對肝腎影響係點, 我情緒起落太大真係會血壓高😉!
咁當然呢個報告係可以比我一個壓力舒緩, 有個指引跟住以後要點做, 近期面對波波眼仔咁負面, 呢個報告都可以算係一個喜訊!