 |
| 相片連結 |
見到波波自己去飲水, 應該係好事, 佢已經好耐無自動去飲水, 但我竟然有D擔心有D唔遂意!
每見到日常習慣有改動, 我都驚唔係好事, 我呢種想法究竟係咪好多餘？
不同朋友對我嘅睇法好唔同, 有話我警覺性高, 有事都可以及早補救到, 積極進取非常好; 相反話我係庸人自擾, 無事搵事做, 總係向唔好嗰方面去諗, 負面情緒高!
我都唔知我係樂觀定悲觀, 自問遇到困難我會頑強面對, 努力做好, 一定唔會乜都唔做等運到; 但另一方面又患得患失好怕做得唔好, 好怕選擇錯誤, 每日思想浮游不定諗唔通!
今次為波波選擇咗食西藥呢條路, 但我一路比波波食呢隻醫理蛋白尿藥, 一路都有擔心會對其他器官唔好, 然後結果係再加藥補救, 呢個情況我最唔想遇到; 過去我一直用自然療法幫助, 無奈今次又幫唔到, 權衡輕重我唯有死死氣用西藥博呢鋪, 希望今次有例外可以平安過渡!
但西藥比我先入為主嘅感覺係好霸度, 無疑見到效果係好好, 但我D豬仔一向對西藥接受度唔多好, 會誘發出好多副作用!
從波波眼仔出事, 突然有一刻睇唔到, 到白內障急速成熟, 我都有擔心係用咗呢隻藥嘅副作用; 我有上網睇過某D藥物真係對白內障有負面影響, 不過問過醫生話無, 既然醫生咁講, 我就繼續用啦!
近日見波波食嘢狀態唔好, 每餐都要手餵, 比起未食西藥前明顯退步; 所以對上一次UPC報告唔好, 我真係好意外, 當日睇佢日常生活其實都幾好, 反之今次用藥後報告係突飛猛進, 但食呢方面就無之前咁好喇, 到今次飲水咁主動, 我又自然咁將個結果曲缐解讀!
唯有叫自己放鬆, 同兩隻豬多D出去散步, 自己都將情緒調節好, 可能波波仲係處於適應期當中, 再比D時間觀察再定下一步!
 |
| video |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
