2017年9月8日星期五

一仆一碌

琴日Am call我, 佢話見我post波波嘅生日相, 無以前咁靚仔喎, 我同意啊!
雖然每個媽媽都有把特別嘅尺, 要去量度自己嘅寶貝, 一定唔準一定盲目, 但客觀去講, 年紀漸大眼仔又白咗又矇, 同年輕時一定有唔同, 呃自己都無用😉!
不過, 即使以後兩隻豬變到老態龍鍾 , 佢哋依然係我嘅珍寶, 我最愛嘅珍寶豬啊😍!

一隻狗狗到達巔峰狀態嘅時間其實好短暫, 細時就羽翼未長, 毛髮未豐, 然後好似爬山, 往高處向上爬, 到達壯年就成熟, 狀態去到頂峰; 可惜喺山頂停留時間好短暫, 就到咗落山時間!
如果底子係好, 都可以慢慢往下行碼緊脚步, 萬一底子係差嘅, 就難免行到一仆一碌, 再甚者一下跌咗落山谷萬劫不復!

相信每個毛孩嘅家長, 大多數都有咁嘅經歷, 寶貝細時好驚佢養唔大, 戰戰兢兢去搵合適嘅糧食, 遇啱身體唔夾或者挑食, 照顧佢已經覺得勞心勞力😌; 然後平安過渡咗BB脆弱期, 到達壯年身體平安穩定, 就開始關注毛髮是否豐盛, 有無標青嘅生命力....

之後, 一回首發覺蜜月期已過, 原來時間好無情, 已經到咗要面對健康走下坡嘅歷程; 彷彿琴日捧於手心嘅BB, 一下子已踏入暮年晚境!
呢個時候心態會不斷調整, 要求不斷下降, 以前有過嘅問題曾經感覺極度困擾, 如臨大敵, 到咗呢個階段, 已經雲淡風輕; 原來目前最關心嘅, 只係佢哋肯瞓肯食 !

今時今日我兩隻寶貝豬正慢慢落山, 已經到達山腰, 我好希望佢哋可以中途稍作歇息; 作為媽媽嘅我, 只願可以陪喺佢哋身邊作引領, 我唯一嘅心願係希望條山路較平整, 偶爾遇到碎石, 佢哋都有大步跨過嘅能力; 即使兩旁佈滿荊棘, 我做得到嘅, 都會盡力為佢地披荊斬棘😊 !

最近波波同達達身體都面對不同嘅環境, 我都漸漸平靜, 之前好急好不安, 真係騰晒好想扭轉個劣境; 依家我會接受到, 器官衰老係隨住時間流逝唔會停; 不過...當然我唔會乜嘢都唔做, 但我會接受我係已經盡咗力😉!
我覺得自己有進步, 亦可以瞓得好好, 唔知會唔會係因為配戴咗晶石幫到😕?

webcam 下嘅珍寶豬

其實我對任何外來幫助一向零感覺, 但自從阿女幫我reiki過, 我好似感官開通多咗...
阿女話我負能量太多, 買咗個黑曜石鏈墜比我, 佢話呢個係下價嘅晶石, 唔係貴重首飾, 但希望幫到我!
真係好神奇, 一戴上就感覺平靜咗, 阿女都話有無咁誇張啊😆!