琴晚食完晚飯, 再同波波落樓下行吓, 不過佢無之前咁開心喇!
以後每晚都會手抱落平台花園行半個鐘, 比佢接觸吓外來環境有D刺激啦!
襯佢視力未太差, 比佢望真吓佢常到嘅地方, 感覺波波右眼嘅視力遲早都保唔住喇, 希望可以保住左眼, 唔會全盲; 雖然呢個係一個缺憾, 但希望波波會慢慢習慣!
之前帶波波見老師做治療, 佢話好多年老狗狗都睇唔見㗎, 咪一樣開心咁生活; 上網睇狗狗糖尿病群組, 仲十居其九都會盲, 而且至盲速度極快; 見D家長嘅分享, 狗狗無咗視力並唔係我想像中咁慘!
唉, 無可奈可都要接受啦, 人遇到傷心事嘅五個階段, 我經歷晒😢!
- 否定(Denial) - 仍希望佢係晶體老化!
- 憤怒(Anger) - 一直診斷話唔係白內障, 突然變得咁差? 如果早D點藥, 應該可以推遲病發卦!
- 討價還價(Bargaining) - 事實已經無得轉彎, 唔想冒手術風險, 希望用藥幫到吓!
- 抑鬱(Depression) - 見到個仔謝晒, 眼仔又白得咁快, 點會唔心罨吖, 個心痛到裂晒啦!
- 接受(Resignation) - 已經無得掹, 仲可以點辦, 唯有希望唔會傷害更大!
呢兩日個仔又唔開胃, 又唔知邊度唔舒服喇, 但猜測亦無謂, 我叫自己放鬆D, 要比時間個仔開動自我療癒機制!
前兩日通過姑娘問醫生, 波波幾時要再驗血, 姑娘話等多兩個月, 等身體適應咗隻藥再作判斷較可為, 依家可能係調整期, 咁快驗都無謂, 唔好再比壓力個仔喇!
唯有再觀察, 如果有更差就早D帶佢去比醫生睇睇!
阿女叫我放鬆啦, 又話黑曜石幫到嘛, 咁的確我係瞓得好好, 無之前咁一晚醒幾次去望吓D豬仔嘅😉!
阿女話出去鬆一鬆, 去睇戲, 揀我鍾意嘅去睇....
今日就出去睇呢部狗狗戲, 預咗會喊, 但喊吓都好, 將D擔心發洩出嚟😂!
果然喊到好似豬頭, 每見一次狗狗嘅別離都好難抵 😭!
睇完心情極矛盾複雜, 一方面傷心狗狗老去, 別離始終要面對, 另一方面狗狗比嘅訊息係要活在當下, 佢哋最重要係活得開心無閉翳!
好羨慕主角咁幸運, 狗狗輪迴幾世後, 都可以喺佢有生之年再重聚, 呢個結局太完美, 我都帶住完滿嘅情緒從戲院行出嚟😊!
睇完戲仲逛咗一陣, 好耐無放低D豬仔去街喇, 今日同阿女食咗增肥午餐, 仲要食埋北海道雪糕限量版😋, 減肥時間都係受唔住誘惑!
然後趕快返屋企喇, 波波真係好痴媽媽, 我喺webcam都見佢係咁坐住等, 等到見到我返去先肯瞓覺😓!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
