2017年9月13日星期三

多一事不如少一事

聽到去街街開心晒

琴晚食完晚飯同阿女閒談, 話波波唔太開心成日瞓覺, 阿女話佢困喺屋企好悶, 每個人性格唔同, 狗狗都一樣啦, 可能波波比較鍾意戶外活動吓!

上次睇完眼科歸家, 有放佢落地跑吓, 不過可能地下濕氣重, 一跑皮膚又出事啦, 呢種天氣放佢落地我真係怕怕!
就因為落地嗰半個鐘, 佢皮膚又紅晒, 又有紅點滿佈肚仔, 攪到今日都未好番, 見佢不停挍, 真係心都實曬😒!
毎次都係想比佢自由咁跑跑, 就帶出好多麻煩, 還好隔日浸蘋果醋, 問題得以緩解, 再噴順勢草本止痕, 已經好得七七八八!

又浸蘋果醋又噴草本😓

我唔係唔想帶兩隻豬出去行, 呢段期間天氣咁差, 狂風雷暴又落雨嘛; 我又多咗顧慮, 怕咗隻仔見到其他狗狗激動, 怕佢又升高血壓, 血壓高又連帶眼壓高就麻煩, 一切未穩定我就多一事不如少一事啦!

不過見佢悶悶不樂又真係慘, 阿女話唔放佢落地都同佢出去逛逛啦, 晚飯後氣溫唔太高時, 都可以落花園行吓, 屋苑唔准放狗行, 咁手抱波波ok啦, 亦唔會碰見其他狗狗, 佢唔會激動嘛!

阿女問佢要唔要出去行吓

琴晚問波波要唔要出去行吓, 睇住佢表情有變化, 個樣又開心又期待, 咁好啦, 就抱住落樓下行一round啦; 琴晚都幾好風唔覺熱, 行一陣都舒服, 行完返屋企波波真係有唔同, 可以飛咁快跑, 呢段期間佢行得咁慢, 我以為佢眼朦啊🙄!

既然手抱行吓佢都咁滿足, 咁以後晚飯後就落花園行吓啦, 達達嘛...佢enjoyed同老公排排坐睇電視, 就算坐車仔出街, 佢頭仔兩頭望望, 最後都係瞓覺😊!
等天氣再涼D先帶兩隻豬坐車仔出去行街街喇!