2017年9月16日星期六

仍係好幸福

琴晚又帶波波落樓下行吓, 自從佢眼仔變差, 出去碰到小朋友尖叫都無吠喇, 就算遇到其他狗狗都好安靜, 呢個情境係我一直期盼, 但今時今日佢有呢個改變, 我好心痛呀, 真係此時彼時, 凡事無絕對啊!
理論上就算狗狗已經全盲, 但佢仍有聽覺嗅覺, 波波應該係感應到週圍有人仔狗仔, 但佢咁安靜, 即係話比我知佢好down😢!

某D光線下見到波波眼仔好似未好差, 其實日光下右眼已好白😭

抱住佢落平台周圍逛,問波波想唔想落地行...
本來佢皮膚剛好轉, 我唔想搵自己麻煩, 但或者波波真係想自己行吓.....
天色已暗, 佢視力又變差, 睇嘢一定矇查查, 我有懷疑佢敢唔敢放膽行呀?

但呢度係佢最熟識嘅地方, 如果佢未完全失去視力, 都放棄戶外郁動吓, 日後真係失去視力的話, 更難過渡啦😓...
一於放佢落地試吓, 最多返屋企幫佢大清潔啦!

波波好叻, 雖然佢無好似之前咁喪跑, 但佢敢行, 亦無須我陪伴喺佢身邊, 自己敢四圍去行吓👍!
我見到佢用個鼻仔聞地下, 然後慢步跑, 跑吓聞吓, 都幾OK呀, 而且, 仲賞我一篤poo poo等我開心吓, 証明佢都仲幾relaxed㗎😂!
媽媽我見到個仔肯嘗試漫步於視力矇矓間, 我眼淚浮上雙眼!

五個情緒階段變化都經歷過喇, 我嘅頑強鬥志又出番, 我唔會就咁認輸睇住個仔盲; 雖然正統醫學話白內障唔經手術, 最終祇有一個結局, 但我仍會為個仔努力去搵辦法, 戰鬥到終結啦!

都係唔想用chemical 產品, 都係偏向用天然療法, 本地搵唔到呢D資料, 但外國包容度大, 好多人嘗試另類療法, 亦見到有成功例子啦!
波波右眼嘅視力接近無喇, 如果唔做手術, 我只有係等, 等到佢連左眼都盲, 我無可能乜都唔做啊....
反正到咗呢個階段, 我已經無嘢可以輸, 去到最後, 佢都係會失去視力, 只係遲定早嘛我點解唔試吓其他辦法？

入咗去一個美國嘅動物白內障自然療法網站, 睇咗好多個案, 亦得到好多鼓勵, 我唔敢將希望set得咁高, 但希望目前嘅視力可以保得到, 或者... 保留到單眼視力, 或者...保住眼球無炎症, 無須去做摘眼球嘅手術...

即刻從美國訂購順勢療法眼藥水, 配搭其他眼藥水, 會跟從個 protocol配合住去做 , 當然會觀察住波波嘅反應, 但起碼呢D天然藥水, 講明唔會同其他藥物有interaction, 我會較放心去用!
依家就等藥到, 但願波波對天然療法配合到, 但願佢唔會有敏感, 但願可以成功🙏!

阿女每日都幫波波做兩次reiki, 工人姐姐話佢每星期去教堂, 都有幫波波祈禱, 仲有其他好朋友嘅祝福, 有咁多關心, 波波仍係好幸福😁!