仍然keep住每日食完晚飯, 就帶波波出去行吓, 達達就隔晚, 我自己一個好難照顧兩隻豬啦, 佢哋無定向咁向左走向右走我分身難, 反正重點係我想波波環境習慣, 萬一真係眼仔盲, 都可以出去行, 比較安定D啦!
果然係出去多咗波波較習慣, 琴晚恢復佢嘅性格😓, 大聲咁吠喇!
不過今次我覺得佢合理㗎, 可能臨近中秋, 好多小朋友出去玩, 初時佢見到D小朋友拎住燈籠仔跑都OK嘅, 我抱住佢唔比佢落地都無麻煩; 但突然間一陣尖叫聲, 我都嚇咗一跳, D小朋友玩到忘形就大嗌!
真係唔好睇小呢D高分貝音調, 於空氣中傳遞頻率幾震撼㗎, 即使我抱住波波已經遠離呢D trigger, 避到最隱蔽處, 但都感覺到波波肌肉拉緊, 接住呼吸急速, 呢D高音頻佢頂唔到, 要大聲吠去抒發!
睇嚟呢幾日出去都有D麻煩, 行到邊都遇到小朋友出嚟玩, 本來安安靜靜波波已經有進步, 佢無吠喇; 但尖叫聲對佢影響好大, 佢會神經緊張繃緊晒!
唔想日間出動太光猛影響佢雙眼, 雖然可以戴太陽鏡, 但佢依家唔太接受啦, 已經眼矇再有阻擋睇嘢仲難, 進退兩難!今晚試試夜D出動睇睇, 希望會揀啱時間!
 |
| 避埋去角落, 呢度無人喇 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
