 |
| 相片連結 |
琴日同個刁蠻公主達達冲涼, 呢個女依家好難服侍, 曾經一度佢乜都好少理, 你幫佢做乜都唔抗拒...
時移勢易, 都唔知發生過乜事, 呢個女變得好挑剔, 乜都唔合佢意思, 惡死騰騰成日閙人, 真奇怪狗狗都會轉變個性😅!
都唔可以每事順佢心意, 唔通做污糟豬咩, 唔鍾意都要冲涼, 仲要修剪毛毛先完事, 我諗佢好唔耐煩好激氣, 全程黑口黑面, 不過我話之佢😜!
以為兩隻豬可以比我過返吓平靜日子, 點知傍晚波波又出事, 不停深呼吸好快速咁透氣, 好不安猛伸脷, 坐直個身唔肯瞓低, 唉...真比佢嚇死!
好突然嘅轉變, 全日都好地地, 無食錯嘢無碰撞過, 又無接觸冷空氣, 又嚟咁嚇我真想死!
第一時間全身觸摸, 見佢有D弓背, 行得麻麻地, 估計係痛症!
近來呢D天氣, 筋骨闗節有痛都唔奇, 雖然我已經保養住, 但唔代表唔會出事!
即刻出齊八寶, 樣樣做齊, 紅外線、場效應、針灸筆、艾灸逐樣輪住; 再比順勢止痛藥, 滴埋放鬆療劑!
見到佢慢慢轉變, 先係呼吸正常返, 無再伸脷仔, 亦肯爬低喇!
阿女今日飛日本，琴晚要爭取時間幫佢, 立刻做reiki兼做Q touch, 要做正骨修復吓條骨仔, 怕咗D骨刺; 好幸運琴晚總算平安過渡, 晚餐時波波食得好好, 到瞓覺時都OK!
健康狀況真係無得安排, 病痛突如其來無得躲避, 呢排人狗都病, 唯一願望祈求身體無事!
節錄賀年一小段, '希望好的來, 壞的走, 健康來, 疾病走!'
祝福大家新嘅一年, 健康, 平安, 快樂, 幸福!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
