從幾隻豬仔身上, 每日都有新嘅學習!
概括咁講, 最能夠體會到嘅 - '幸福唔係必然'; 而幸福嘅定義, 可以係好平凡, 甚至可以係之前你唔想面對覺得極麻煩, 有一日失去嘅時候, 你會對呢D麻煩極期盼!
以前....
好怕屋企有尿臭味, 尿片一定要搵癖味效能佳, 到豬仔有蛋白尿時, 好驚腎功能變差, 最怕會聞唔到尿押!
見到波波通屋跑, 好怕佢跑咁快會撞欄, 總係話佢曳曳亂咁跑, 想睇少一眼都難, 好大壓力嘛; 依家唔好講跑, 佢肯行我已經開心到想喊!
波波達達之前成日鬧交, 已經無細時咁融洽喇, 每次見佢哋嘈嘈吵吵都覺得好煩...今次波波眼仔出事後, 我無見過佢哋再嗌交, 每次都見佢哋坐埋一齊, 瞓覺都拉近距離, 依家係乜嘢環境佢哋好明白, 原來佢哋嘅親密從來無減, 只係唔同表達.
而我...好想好想再聽到佢哋嘅吵鬧!
太多太多講唔晒, 其實日常生活中嘅一切, 可以食飯可以行, 可以睇到、 聽到, 所有所有睇落簡單, 原來會有可能突然失去無得轉彎😓!
而我發覺自己都無咗咁多唔耐煩, 即使有時感覺差, 都提醒自己要豁達, 當然我仍然要學習!
自己脾氣我明白, 急躁騰雞改唔到啦, 但我已經可以縮短壞情緒時間, 發洩過後比以前更快settle down!
嘗試提醒自己, 每次唔愉快都係學習, 可以接收轉化當然係好事, 太難頂嘛, 避開算喇!
人生苦短都要學習活在當下, 無謂太勉強自己委曲求全, 要學習狗狗活得簡單, 食嘅時間就食, 玩嘅時間就玩, 太多擔心會活得好慘, 煮到嚟食算喇!
自問自己好小心養幾隻豬, 戰戰兢兢咁都唔見得會無事, 總會有預料唔到嘅突發事, 不如學習睇開D, 雖然一定會情緒被牽動, 但會安慰自己, 我已經盡咗力喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
