琴日做冬, 但阿女同我都未病好, 幸好我開到把豆沙聲, 不過勁喉嚨痛; 今年唔出去食喇, 一家齊整分享係重點, 食乜都咁好!
琴日我有最重要嘅節目, 要帶波波眼科覆診, 經熊醫生檢查後話暫時穩定, 傷口亦已結痂, 日後只需小心保護; 維持住滴眼藥水, 可以兩個月後再覆診, 如無突發事故!
算係暫時鬆口氣, 希望唔好再節外生枝, 但願可以好好維持住!
前兩日先講緊波波達達係知道發生乜事, 達達知道波波整傷眼仔, 無閙過佢; 波波又會坐近達豬, 相親相愛平靜咁相處; 點知個仔好D, 兩隻豬又恢復吵嘴, 今次我由得佢哋, 實在享受曾經嘅失去, 原來睇兩隻豬閙交係一種樂趣😊!
今日的起心肝, 將手機嘅相片backup落電腦作處理, 太多相片好驚有意外失去; 其實想做呢件事已經好耐, 但一浪接一浪出事不停衝擊我情緒, 好似無安樂過日子😰!
一路做一路重溫, backup D video最心噏, 見到開心活潑嘅豆b, 跳來跳去等食, 越睇越掛住佢; 然後見到我嘅寶貝波波豬, 用佢特有嘅馬步飛快咁跑來跑去, 亮晶晶嘅眼仔閃住光芒, 發夢都無諗過會喺咁短時間, 視力突然失去!
回頭望吓隻豬, 定定咁坐咗喺度, 個心痛到揦住, 原來見到個對比, 接受係唔容易!
今日我真心好佩服, 嗰D被大火燒到毀容嘅人, 佢哋實在有超強意志, 可以咁勇敢面對過去嘅自己, 經過咁殘酷嘅意外, 仍可以堅強咁活下去, 呢種精神實令我敬佩到五體投地, 我真係無鬼用, 面對變故會心碎!
三隻pom pom豬, 只剩低兩隻, 波波又無咗視力, 唯一達達嘅巴辣個性仍然維持, 最鍾意做嬲嬲豬😂!
過去嘅已經追唔返, 未來係點亦無人知, 但願我可以好好把握 當下所擁有嘅一切, 有朝一日呢一切都定必成為過去!
又到聖誕, 但節日對我好似無晒意義, 當然唔會再做大project, 連出去影相都無興趣; 曾經有諗過每年同佢哋影過節相好白痴, 但今日我好慶幸我有留下美好嘅回憶, 實在彌足珍貴!
預祝大家聖誕節快樂!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
