琴日係我嘅生日, 無諗過會慶祝, 阿女出差未返, 波波眼仔又出事, 自己無曬興緻; 一早起身如常服侍兩隻豬, 生日日子都已忘記; 餵完兩隻豬望吓手機, 見到朋友道賀先記起, 再收到遠方姐妹嘅whatsapp, 仲有阿女訊息話趕及轉機, 唔使等下一班次!
佢話會趕到返嚟, 趕及同我慶祝生日, 其實對於慶祝與否我全不在意, 不過佢咁有我心, 我當然歡喜!
其實有心唔怕遲, 佢有放上心我已經心甜死, 阿女一到步匆匆忙忙喺樓下買個蛋糕仔上來, 無期望下收到個蛋糕, 我確有意外驚喜; 老公今年就忘記咗喇, 不過我唔怪佢, 佢都一樣擔心波波, 注意力比哂佢!
仲有乜嘢生日願望? 但願一家平安喜樂過日子啦!
阿女話jet lagged要休息, 生日飯改為今日先出去, 但老實講我唔放心留低波波, 工人姐姐今日day off, 點放心出咗去啊!
阿女話咁就近食一餐啦, 意思意思每年都一齊食生日飯, 我就情商工人姐姐今日早D返, 出去短短嘅時間啦!
 |
| 樓下開咗間上海菜館, 阿女跟住食評叫菜, 好好味, 值得一試👍! |
理論上波波眼仔已經好返, 但佢好似將屋企嘅擺設忘記曬, 之前都仲可以自己來去厠所同圍欄, 依家差到唔敢行; 咁應該之前佢左眼仲有輕微視力, 受傷後全睇唔見喇!
呢種變數我預咗喇, 唯有帶住波波耐心練習, 先上拖帶等佢有信心開始行; 波波有拖帶比較大膽, 但佢好似盲頭蒼蠅亂咁行, 團團轉全無方向感, 我拖住條帶攪到我暈曬!
又話狗狗適應力強? 用鼻仔可以辨別方向? 點解波波行到亂曬㗎?
阿女話波波似我囉, 都係路盲, like mother like son啊😂!
咁又要再諗辦法, 為咗要佢肯行, 唯有每日都拖繩練習, 唔行怕佢慢慢會腳仔無力, 肌肉萎縮就慘!
研究緊比佢用bumper ring, 但要考慮負重, 太重會辛苦佢一定唔肯用, 暫時用住拖帶, 再諗辦法!
 |
| 主人DIY比隻芝仔, 現買嘅太重, 可以參考! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
