我真係好怕病, 咁係人都怕病嘅, 但最慘次次都失聲嘛!
好彩星期一帶波波見梁醫生時, 仲可以講嘢, 希望過兩日帶波波見眼科熊醫生, 已經開返聲啦!
梁醫生話波波食中藥反應唔錯, 蛋白尿仍控制於正常水平, 今次之後可試吓停晒西藥喇; 我擔心波波依家無驗血, 以後無數據跟進, 點確定腎功能有無變差?
梁醫生話身體情況仲要睇臨床診斷, 有更多資料當然好, 但唔想太勉強波波啦; 佢覺得波波幾好吖, 脷仔紅潤咗, 手腳温暖, 皮膚彈性頂呱呱; 腎功能差多會脫水, 起碼現階段無需要擔心住先喇!
已經停曬西藥, 下次覆診前再驗UPC, 睇睇有無反彈, 如果穏定就會keep住用中藥保養, 以後定期驗UPC作追蹤, 定時覆診就ok喇!
波波近來表現係唔太差, 眼仔唔痛後, 胃口算係唔錯喇, 都唔強求太多, 食得瞓得已經好好, 希望佢保持穩定就心足喇; 眼仔睇唔到呢樣, 只可以慢慢適應, 欲速不達, 希望搵到適當物料去做個bumper ring, 可以幫到佢有信心自己行.
暫時我都係每日用拖繩, 帶住佢喺屋企兩頭行, 希望佢有返D郁動之餘, 仲可以辨別到方向啦, 不過我諗都唔容易, 認路呢樣絕對係難, 呢様我好明白!
有朝一日佢可以再度獨立, 絕對係bonus, 就算唔得我可以一直咁帶, 我話過由我代替佢雙眼; 波波自從睇唔到後好黐身,可能失去安全感, 一定要我喺佢附近先安心, 連老公抱佢都唔肯, 可能佢只係對媽媽信任!
達達呢輪又唔知做乜喇, 已經無打乞嗤呼吸正常返, 但竟然5日都無排便, 探肛係有poo poo嘛; 問過醫生, 話可能纖維唔夠又運動少, 咁都係有可能; 呢排天氣咁凍公主凈係食同瞓, 胃口又轉變咗啦, 加咗菜糧唔食, 我停咗比菜幾日, 咁就又要我擔心😞!
唯有比多D南瓜同apple fibre, 再餵蜜糖水又按摩肚仔, 希望幫到啦, 達達公主我真係唔想因為咁又要見醫生啊!
已經好好保養, 唔敢掉以輕心, 呢兩隻豬, 真多花樣, 想安樂D渡日都唔得, 總係要擔心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
