今日襯住天氣回暖, 趕快幫波波沖涼, 近排密密出入診所, 好怕有病菌感染, 個心總係有D唔安樂; 但又唔敢輕舉莽動, 怕佢眼仔有傷口未復原, 萬一有水彈咗入眼, 個傷害可以覆地翻天, 我真係唔敢行事貿然!
 |
| 濕咗身都唔怕會凍親, 真係幾好! |
經過幾日細心觀察, 又剛好天氣咁暖, 要當機立斷😉, 快手沖返個靚涼先, 希望波波沖走D衰氣, 再無衰運纏繞, 身體健康踏入 2018年!
其實我真係別無所求, 亦唔再諗咁長遠, 見兩隻豬食得瞓得我已經償願, 今次經過波波眼仔突變, 我真係想法有咗改變!
要點做先係好? 我仲可以做咩添? 自問小心翼翼咁湊幾隻豬, 得到都係吃力不討好, 付出嘅係枉然; 往後都係頭痛醫頭, 腳痛醫腳算!
我之前完全唔知, 波波嘅眼仔睇唔到, 未算係去到最差嘅終點; 原來唔做白內障手術, 係揹住個計時炸蛋, 步步為營根本無得打算!
有諗過係咪決定做錯咗? 係咪應該博呢鋪? 博又有幾多%嘅勝算....
但見到佢今次角膜受傷, 已經咁慘, 成隻豬謝晒, 唔敢諗手術會帶比佢創傷有幾大; 就算麻醉風險可以捱過, 個腎嘅後遺症又有幾高? 手術真係一條最好嘅出路? 手術後 100%可以睇到? 呢段蜜月期可以維持得幾耐到?
我唔知咩係最好, 但我一定唔想個仔受苦, 佢睇唔到當然係唔好, 但起碼無好痛苦, 佢仲有機會學習適應過渡!
食咗中藥後我目前睇到佢係有進步, 胃口正常瞓得好好, 腳掌仔溫暖脷仔又紅潤, 我真係唔想一個手術一個麻醉, 所有努力又徒勞...
再三回想都係唔敢博呢鋪, 希望波波會明白媽媽, 唔係單純自私怕失去你, 我真係唔捨得你受苦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
