今日一早食完早餐, 達達公主賞賜咗我佢嘅poo poo, 叫我咪再煩; 呢隻豬真係激死人, 係都要搵D嘢同我玩, 係咪呢排我注意力集中咗喺波波嘅眼, 公主唔順氣呀?!
達達胃口麻麻, 都係揀食啦, 呢D耆英挑嘴唔出奇, 一如人類嘅老人家, 口淡淡, 食物要濃味D先啱; 近日一加菜糧就唔肯食, 我停咗比菜5日(但都有加返南瓜㗎), 佢就5日都無便便, 有無咁誇呀😲!
其實咁多日無便便唔擔心就假, 但上次波波唔痾, 醫生有講過, 判斷是否便秘, 唔係時間相隔咗幾耐, 係要睇佢有無肚仔脹住, 想痾但用力都痾唔到, 或者poo poo 又乾又硬; 仲要睇食物都影響好大, 食得多嗎? 纖維夠嗎?
如果精神正常, 食慾正常, 唔使太擔心啦!
醫生當然唔建議用瀉藥, 唔好用乳果糖甘油泵嗰D啦, 叫我用最天然嘅方法, 補充纖維素, 唔肯食菜可以加apple fibre, 開足夠份量嘅水餵佢啦!
呢兩日都有餵達達, 但最終都係要比菜, 今日強迫佢食返菜, 即刻通晒👏!
poo poo並唔乾硬, 睇嚟我真係過份擔心喇, 不過....5日喎, 點可能唔驚呀😉!
達達性格改變咗喇, 佢有唔滿意就鬧, 日日發洩日日鬧, 鬧完就瞓覺, 亦唔覺佢有唔開心, 同以往分別好大; 以前達達唔開心會鬱埋, 依家就唔會喇, 佢學識咗享受當下; 唔怪得豆b走後, 我唔覺佢有任何改變, Ka傳心時佢有咁嘅回答, "每個生命最後都要返天家, 唔明做咩要傷心啊" , 佢想法有昇華!
佢最鍾意每日同老公一齊排排坐睇電視, 老公放工一踏入門口, 佢瞓緊都會彈起身, 呱呱叫提示快D抱佢上梳化; 老公嘛, 一路氹住等等, 等等啦, 快手快腳洗手換衫...
兩公婆甘之如飴做狗奴才, 呢樣我哋最夾😜!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
