琴日又帶波波見熊醫生, 檢查後話眼仔嘅傷口已埋, 呢個真係我最好嘅生日禮物😄, 經此一役, 我會加倍小心, 白內障眼仔易感染發炎, 以後要更留神喇!
醫生叫兩星期後再覆診, 總之無入侵性嘅檢查, 我一定配合, 姑娘讚我呢個媽媽好乖好有愛心😜!
主要係波波並唔抗拒檢查眼仔, 咁比醫生睇睇我會更放心, 依家宗旨係配合波波, 佢太抗拒嘅檢查就由得佢, 無謂攪到佢要惶惶恐恐咁度日!
感恩近日遇到嘅醫生都好有愛心, 會著重個仔嘅心理質素, 唔會唔理咁多, 需要嘅檢查一定強迫執行; 依家嘅做法係主要臨床診斷, 配合尿檢作有限度嘅依據去用藥, 佢唔想驗血唔迫佢, 比返個選擇權佢, 主要佢開心!
上次見梁醫生, 講到波波胃口唔好, 佢轉咗藥, 呢幾日波波有進步; 咁可能藥物幫到, 可能眼仔唔再痛, 總之肯食就好, 我唔再執著原因!
早幾日DIY自己親手做咗個愛心頭罩, 就算波波眼仔傷口好返, 依家瞓覺都唔敢唔戴喇, 呢個仔依家會用手撥眼, 可能睇唔到佢仲未習慣😢; 當然戴住頭罩舒服極都有限, 我唯一可以做嘅係要保護好佢眼仔之餘, 盡量令佢舒服D啦!
呢個頭罩原來仲有另類作用, 戴住照紅外線可以保護眼仔, 又可以落返床仔同達達一齊, 之前用大餅唔安全, 波波會擦到眼, 診所買膠嗰個又驚撞到達達, 呢段時間都要分隔, 如果整傷埋達達眼仔就死火喇!
忙碌嘅生活暫時告一段落, 阿女business trip完咗已返, 可以自己照顧番貓貓; 其實忙都係一種另類幸福, 有時間回一回氣就好, 仲有得忙好過無嘛😝!
每個人都有屬於自己嘅幸福, 從來一得一失上天早注定好, 有嘅時候要惜福, 好好享受就好!
 |
| 日中當然會鬆開頭罩等佢舒服D啦l |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
