2018年3月2日星期五

向前大踏步

一齊浸微泡浴

天氣預報話下週又轉涼, 氣溫會急跌10度, 今年天氣好反覆, 時冷時熱真係捉摸唔到; 辜勿論屬真屬假也好, 都係快D同兩隻豬浸個微泡, 反正自從有咗烘毛機, 可以兩隻豬一齊做, 唔使再擔心冷親, 又唔怕得一雙手, 唔可以同時幫兩隻豬一齊吹毛😊, 咁方便真係幾好!

一齊烘乾毛毛

沖完涼都好快可以吹亁毛毛, 波波比達達乾得快, 一來佢毛質較好, 不過主要係達達密毛, 差不多要用雙倍時間; 還好達達好enjoyed喺裡面瞓覺, 咁暖暖哋吹住風, 佢又唔嘈就最好啦!

背脊毛毛仲未換好, 但少咗好多黑毛

循例會修修毛, 睇落整齊D都好, 發覺達達肚仔嘅毛換得七七八八喇, 毛質轉好毛色都較有光澤, 而背脊仍然係羊毛狀, 但黑毛少咗好多喇!
依家係三月初, 再過多兩三個月應該會更好; 其實我已經無咁在意佢D毛, 唔甩當然好, 好感恩有進步, 有改善真係修到, 多謝老天眷顧!

肚仔同心口毛毛幾好喇

今日波波一樣飲保養份量嘅中藥, 波波應該係接受得好好, 睇佢日常反應就可以知道; 個仔今日好活躍, 會追住達達聞pat pat (哈哈，媽媽咁開心好變態)😁, 仲玩到跳吓跳吓, 開心到手舞足蹈; 自從佢睇唔到, 一直小心翼翼咁行動, 邊仲敢跳舞!

好開心又見到呢種互動

今日我坐喺佢哋身邊, 好清楚見到波波嘅改變, 就正如一開初食西藥佢攰到唔識郁, 我就知道佢用咁強西藥唔好, 今日同樣道理, 用中藥後我明顯見到佢嘅進步!

真係好開心, 好多謝De比波波適合嘅藥方, 聽日我會再加少少份量, 睇吓波波嘅接受程度, 慢慢嘗試去搵一個最適合波波嘅份量, 希望效果會更好!
我相信明天會更好, 拖住波波正能量向前大踏步😄!

一直有收藏國泰航空嘅12生肖公仔, 其實無好刻意去做, 夾到阿女出trip就最好, 太在意會好辛苦, 所以有幾年嘅生肖我都無; 不過今年係豬仔嘅本命年, 狗年嘅狗狗, 今日先拎到, 遲D收到都好過無啦😉!