 |
| 相片連結 |
星期三用新藥方執藥比波波, 因為藥材好普通, 我比較放心比佢飲用, 所以當晚就試咗比1ml, 睇吓反應如何; 但相隔十幾分鐘, 波波又開始有D呼吸急促, 我未敢肯定同藥有無關係, 因為天氣潮熱都有影響, 而且 1ml嘅份量, 唔應該有咁大反應, 見佢漸漸平靜返, 我就放心喇!
琴日日間再試咗1ml, 都有相同反應, 但好快平靜, 我諗有關氣溫啦, 即開冷氣加抽濕; 一整日無唔正常, 我都無擔心, 到晚飯後再試 1ml, 情況依舊!
今次開始諗會唔會真係有關藥物, 雖然係好少份量, 但可能佢都唔可以承受, 我估呢劑藥應該唔夾喇, 無可能會呼吸咁急!
今次經歷時間有幾個鐘頭, 我要開氧氣比佢聞, 琴晚真係又驚又擔心!
可能即使係好普通嘅藥材, 都要配合體質, 而且波波同達達都細身, 要掌握適當用藥量學問好高深; 咁細嘅狗狗, 有病去睇醫生, 多數獸醫都唔係好想接診!
今日唔敢再比藥喇, 等波波身體清空一吓, 中西藥並用似乎真係唔可行, 早前明明見波波有進步我咁開心, 一下又將我打沉!
可能當日梁醫生都有相同顧慮, 會諗到波波中西藥同用唔可能, 只可惜佢喺電話無解釋原因, 凈係話唔好, 叫我唔使覆診, 我有D唔開心, 無再追問'唔好'係咩原因!
達達呢兩日都有抽筋, 呢種唔同狗狗無意識游水狀態, 佢只係縮起前手企唔穩, 會低聲"鶯鶯"叫咁啦, 每次病發都係瞓緊, 側臥壓住果邊身; 我感覺佢壓住身體感覺痺痛, 又可能類似人類嘅小腿抽筋; 呢個情況幾年前已經開始有, 不過幾個月先碰到一次, 醫生都話唔使擔心!
中醫角度會認為呢種叫血氣唔通, 氣血唔正常運行, 咁亦有可能佢腦仔血管影響到佢咁, 但情況唔算嚴重, 用順勢療劑一分鐘內就可以平衡; 呢D情況獸醫西藥幫助唔大, 醫生都話無需用藥, 咁多年都只係幾次發生, 我無太上心!
近日可能用中藥幫佢保健, 佢虛不受補就情況失衡, 呢幾日來隔日抽一次, 我依家用任何藥都唔敢喇!
雖然我目前決定暫停中藥, 我要觀察究竟乜事發生, 但仍衷心感謝De幫忙為波波搵新路, 只要搵到原因, 兩隻豬因乜會咁, 往後仍可能再用中藥, 無嘢係絕對無可能!
已經諗過, 試過, 做過, 幫過, 但結果係咁, 要再作出新嘗試我唔會再咁勇敢😰, 目前唔再諗, 卑微嘅希望只好向舊路尋; 一切以佢哋承受到為大前題, 可以幫到幾多唔再問!
心情好大腦會釋放大量安多酚(endorphin), 呢種正面情緒係健康最佳良藥, 既然我已經努力過無得到預期結果, 我就用最basic嘅適量蛋白尿藥配合supplement!
唔再諗, 今日見陽光普照帶兩隻豬出去散吓心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
