 |
| 相片連結 |
每日keep住同兩隻豬仔出去行吓, 吹吓風曬吓太陽, 身心都健康D啦, 不過呢兩隻豬都好情緒化, 有時木口木面一臉不耐煩, 要佢哋開開心心都唔容易㗎!
 |
| Link: 護理篇 |
喺屋企都盡量同佢哋玩吓, 不過年紀大咗唔同以前啦, 好快已經無興趣玩, 連比反應都懶, 自己走咗去瞓覺!
我呢個媽媽都唔知要做咩先啱, 唯有每日都keep住同佢哋做護理啦, 尤其天氣潮濕時更加唔可以懶, 網上睇到話艾灸可以祛濕, 咁梗係要做啦, 最近又睇到有人用美容按摩用品同貓貓按摩, 我又即刻試吓, 估唔到效果咁好, 兩隻豬都好舒服啊👍, 可能比較容易掌控平均力度啦!
每日分開時段, 用不同嘅護理方法做一陣間, 希望佢哋少D出亂子啦!
呢兩日同佢哋用試紙驗尿, 波波蛋白尿算控制得幾好, 精神胃口都唔差, 希望穩定啦; 達達數據顯示頗理想, 結果算唔錯喇, 不過呢個女受腦神經影響下, 脚仔無咩力, 好似越來越差, 咁我都明白過程唔會突然自動逆轉啦, 最麻煩係佢鍾意側身瞓覺, 又唔似波波會換位, 瞓到死豬咁, 就做成手仔抽筋啦!
 |
| 成日都壓住右邊身瞓😓 |
Reiki 陳老師講過, 達達嘅左腦右身較差, 佢每次都係右前手抽筋, 都係右後脚微震, 老師話佢運動神經區controlling都唔好, 所有都係因為腦傳導差, 呢D腦神經問題都好煩!
腦嘅問題真係唔知有咩可做, 當然唔會麻醉去做個MRI搵原因啦, 唯有叫阿女做多D reiki幫吓, 幫得多少都好過無啦!
兩隻豬都11歲半喇, 時間點解過得咁快, 年紀大好多麻煩嘢就走晒出嚟啦; 波波睇唔到, 腎功能不全, 達達就腦退化!
我明白我再努力都敵唔過器官老化, 但有時都好驚, 好驚面對未可預知嘅變化, 不過我會努力, 盡力幫兩隻豬過得開心舒服D啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
