 |
| 懶洋洋嘅波波 |
真係好怕呢D忽冷忽熱嘅天氣, 明明話會凍, 結果係熱到黐線, 最慘係D濕氣, 攪到人狗都攰到癲!
早幾日開始, 又同波波加大咗少少中藥份量, 當然留心住佢反應如何; 見佢瞓喺床郁動少咗, 比之前懶惰, 仲要呼吸急咗, 真係嚇死我, 祇加咗丁毛咁少份量, 有無咁誇咁大反應啊?
 |
| 呢種天氣, 兩隻豬都唔舒服 |
無意中望向個溫度計, 濕度有成 92%咁多, 我係有感覺潮濕, 但無留意濕度去到咁高啊, 一見到咁就知有影響咗波波; 都真係疏忽咗, 天氣凍就緊張mon住溫度濕度, 慌死凍親D豬仔, 熱嘛就大意咗!
即刻開抽濕加冷氣, 加快將溫差控制妥, 波波嘅呼吸好快平靜咗; 呢兩日當然小心監察住溫差, 少少疏忽都嚇怕我; 好彩波波已經正常返無唔妥, 咁即係唔關加藥嘅事囉!
其實係自己過於緊張, 每次加大藥量都有D驚, 好怕over咗; 但De有講過, 藥力唔足係會得唔到預期嘅效果, 酌量加減自己去搵個適合份量, 因為每個身體接受都有分別, 咁當然唔可以加到出咗條界線; 如果見到有唔妥就比返之前份量, 唔會有太大問題, 因為唔係一次加好多!
咁波波仍接受到, 無影響精神胃口大小便, 就繼續呢個份量先, 再觀察耐D先算!
呢種天氣, 真係影響毛孩好大, 尤其上咗年紀嘅就更差, 見到朋友話早兩日狗狗突然大嗌, 都要立刻半夜急診, 食神經消炎止痛藥再專科轉介; 我就係怕天氣潮濕誘發呢類痛症, 所以每日都好勤力同兩隻豬仔做保養啦!
仲有影響更大嘅就係心肺呼吸問題, FB睇到有好多狗狗病發, 見家長四處張羅氧氣, 又急送院留醫真係慘; 連帶達達豬, 呢兩日都打乞嚏打到鼻仔濕晒!
達達呢個問題真難攪, 馮醫生話佢無鼻涕無發炎, 無可能開抗生素, 無需要嘛; 呢種情況就算開敏感藥都幫助唔大, 要靠佢自身抵抗力克服啦, 但佢係咁乞嚏都辛苦嘛!
唯有聞氣舒緩吓, 今次用mask集中D, 希望幫助更大; 還好達達精神唔差, 鼻敏感都真係好煩!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
