 |
| 相片連結 |
今日天氣轉涼, 新衫仔已經可以上場, 今次心急嘅timing撞到正, 真好😉!
買啱size真係好, 兩隻豬仔著得好舒服, 質料柔軟又唔焗, 下個冬季再睇吓有咩新款會更好😄!
誠意推介, 真係舒服, 無廣告成份, 無佣分㗎😜!
https://www.goldpawseries.com/product/fleece-stretch-colors/
波波眼仔唔好, 但比佢戴住個保護環佢行得唔主動, 要我不停拍手不停叫喊, 來來回回咁走來走去鼓勵, 佢先會跟住我慢跑, 咁落去我好快又聲沙喇; 唯有另想辦法, 喺屋企地下放多D cushion, 每有角位都放作為保護, 睇嚟呢個方法都行得通, 起碼唔使我叫, 佢自己都會主動來回咁行吓!
達達仍然係猛打乞嗤, 呢個問題都困擾咗好長時間, 有睇過獸醫食過西藥, 但完全無幫助啦; 然後嘗試過用西草本藥, 順勢療劑, 用生理鹽水加落Nebulizer, 及後加入靈氣治療, 仍然幫助唔大, 佢嘅乞嗤一樣係咁照打, 有時連續咁打又噴鼻水, 都真係好驚佢會整傷頸椎, 又驚會整到鼻膜破裂噴血嘛!
但我都無曬辦法, 鼻敏感呢樣嘢真係好難搞, 近日見波波食中藥, 就即管問問De咁情況食中藥有無療效!
De話打乞嗤但衹流透明鼻水, 中醫角度係虛啦, 都可以用溫和嘅藥材試吓; 見藥材都算好普通, 紅棗陳皮等等, 咁我又放心試啦, 希望今次幫到達達!
琴日執咗藥, 達達呢劑細細包, 得幾樣藥材好簡單, 今日開始比佢試吓, 已經飲咗2ml, ok無不適，慢慢再增加!
可能有人會覺得我好荒謬, 無把脈就咁開中藥比狗狗, 祇可惜香港無正式動物中獸醫, 唔可以直接斷症較麻煩!
但一般會用中藥嘅西獸醫, 對每隻中藥嘅認識, 唔一定會比一個正統中醫瞭解更深卦; 西獸醫大都用中成藥, 選擇配方有限, 而用複方加減藥材就有D困難!
今次我用嘅中藥方, 係出自人嘅中醫, 佢有對症下藥, 亦會避開狗狗唔用得嘅藥材, 我好放心!
 |
| 達達都唔抗拒呢劑中藥, 肯乖乖咁飲😌 |
唯一係佢唔會為狗狗斷症, 斷症方面我仍需靠動物醫生, 所以我要提供狗狗一切資料, 驗血驗尿報告, 狗狗脷仔顏色, 精神狀況同呼吸次數等等, 我覺得咁用中藥都還算可行, 當然我更希望香港真係有動物嘅中醫應診!
事實我嘅豬仔接受西藥唔太好, 每每誘發高嘅肝酵素, 我無晒辦法唯有試咁做, 希望今次真係行對路, 兩隻豬可以有正常生活質素, 精精神神生活得好!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
