豆b已經離開咗730天, 你真係已經離開咗我兩年? 點解偶然半夜我去厠所, 仲好期待你會出現? 就好似以前咁你會企喺門邊, 我一打開門你就衝前, 睡眼惺忪直撲到我腳邊!
豆b啊豆b, 兩年來有幾多次期盼你再出現? 又有幾多次失望悵然!
好記得你走前, 嗰一晚我抱住你面貼面, 我同你講乖乖哋瞓覺, 瞓醒就到彩虹橋, 媽媽好怕你受苦, 唔想你拖住個病久延殘喘, 唔好掛住媽媽, 我哋一定會再見; 然後我輕輕放咗你落床, 為你開氧氣, 將你同床仔一併放入氧氣箱; 你就係咁張大眼仔望住我, 眼神蘊含住萬語千言, 然後慢慢背轉面!
我從你背後仍可以睇到你肚仔起伏, 呼吸得好自然!
呢張相, 係你在生時, 我為你影嘅最後一張相片, 幾個鐘頭後, 你就離開我上咗彩虹橋!
呢兩年來, 會有好多個突然, 係突然對你好想念, 嗰種想念好似一把刀尖, 深深直插向胸前!
豆b你有新嘅旅程, 唔再返嚟屋企唔緊要, 最重要你生活得好, 我最想你一如從前, 時刻掛上笑面; 不過, 喺我哋未重逢之前, 可唔可以偶然...偶然到媽媽嘅夢中, 同媽媽再見個面?!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
