 |
| 相片連結 |
每日堅持住同兩隻豬仔出去行吓, 今日好好彩, 早咗落去行, 返到屋企已經落大雨喇!
天氣涼涼哋對兩隻豬心臟氣管無咁大負擔, 適當時間放佢哋落地跑跑, 達達出咗去係明顯生猛, 喺屋企成日嘈住要返入房瞓覺!
可能無出去一段長時間, 波波落咗地唔習慣, 企定定唔係好敢行, 要熱身去感覺四周環境一段長時間, 先敢開步慢慢行, 真係行得好慢!
以前佢行得飛咁快都唔會等達達, 只有豆b間中會傍住達達行, 真係風水輪流轉, 依家到達達唔等佢, 永遠行喺佢前面喇!
自從月前唔知點整親, 波波腳仔力度變差, 已經同以往唔同晒; 重點係佢睇唔見, 加上又增磅, 個身重咗腳仔關節壓力加大, 有太多變數加加埋, 造就佢出外行得差啦; 以前聽人講, 毛孩年紀大咗, 健康情況可以改變得好快, 我完全感受到晒!
體重方面我已經一直將佢飲食調較, 但唔可以食太少嘛, 腎仔有事一瘦就麻煩, 維持體重都係重要一環; "維持體重"呢幾個字寫就容易, 做就超難, 人都好似一生週旋喺呢個題目上, 過肥過瘦又話要增肥又話要減😅!
都祇可以盡力而為, 幫到嘅盡量幫吓, 腳仔方面熱敷照燈針灸筆, 加上按摩輪住嚟做, 唔敢不停刺激佢肌肉關節怕物極必反, 好心做壞事最慘, 眼仔嘛, 唉.....!
隻豬仔係行得差咗, 還幸精神幾好, 仲企得好神氣啊😍!
 |
| 睇唔到, 行得唔好, 不過企得好似model😊 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
