 |
| 相片連結 |
每日都帶兩隻豬仔出去行吓, 即使工人姐姐放假, 我一拖二都同佢哋落吓樓下, 總之盡量比佢哋呼吸吓唔同空氣, 出去兩隻豬都表現開心嘛!
近來達達表現唔錯, 比之前食得好咗, 雖然都係要餵, 但肯食最重要啦, 好耐無對零食表現咁熱烈, 依家會同波波搶吓, 呢一切一切, 應該係向好嘅方向行, 但我有不安嘅第六感覺, 隱約覺得有D嘢唔妥喇!
好記得豆b都經歷過一段好日子, 好到我同老公都有懷疑, 係咪醫生斷症有偏差, 見佢表現正常, 食得玩得日日笑哈哈, 話佢時日無多? 有無搞錯呀?
可惜呢種正常又開心嘅日子好短暫, 幾個月後, 豆b就離開我哋喇, 見到達達嘅進步, 我個心好驚, 好怕!
記得豆b走後有搵過Ka同兩隻豬傳心, 當時波波有唔開心, 但達達表現豁達, 佢話每個生命都係要走呢條路, 期限到就要返天家, 無咩好傷心呀; 佢完全無不捨嘅感覺, 唔似豆b為咗陪伴我會撐, 咁即係佢唔會拖拉.
唉, 係好定壞?!
老公話無得驚無得怕, 生命總會有終結嘅一日, 近日好幾個朋友都突然倒下, 佢話其實睇到化, 我哋都唔知自己幾時拜拜啦, 要活在當下嘛; 目前達達表現良好, 又無痛苦, 更要珍惜呢D好日子啦, 終日擔驚受怕點過活啊? 佢話係我諗多咗喇!
我係咪真係如阿女咁話, 總係搵嘢嚇自己? 但回想精精, 安安, 樂樂都輪住每年跟住咁離開, 我真係有心理負擔, 我承認我確實心存恐懼啊!
我相信上天有安排, 時間到咗點做都無得挽留, 正所謂食幾多著幾多係有定數, 祇要佢過得開開心心, 食得瞓得又無痛苦表現, 已經好好; 其實我都好安慰見佢呢排落街咁開心, 呢個刁蠻公主唔係咁易討好, 好難得佢表現咁高興, 佢要求好高!
踏入10月, 個腦不斷盤旋住豆b離開嘅情景, 可能加重咗我有呢種陰影, 希望我真係如阿女所講係我搵嘢嚇自己, 希望真係如老公咁話係我諗多咗, 我嘅第六感唔靈!
多謝阿女買比佢哋嘅平安飽吊飾, 上次我講過之前朋友送比佢哋嘅平安飽, 食咗就無得剩, 阿女就買咗呢個吊飾, 一直忘記比我; 見我呢排諗嘢咁負面, 就記起快D拎比我, 等我個心較安定, 多謝佢呢份心思, 我心領!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
