 |
| 相片連結 |
每日都會同兩隻豬仔出去逛逛, 不過早幾日落過雨, 天氣麻麻, 唔知係天氣轉變關係, 還是有其他, 達達前日去完街, 返屋企食咗午餐, 隔無耐將所食嘅嘢嘔返晒😖; 阿女話佢貓貓胃口都差, 其中一隻同達達情況一樣, 食完就嘔, 不過最大分別係貓貓嘔完無嘢一樣, 跳得玩得, 達達就好似就快死得啦😟!
呢兩日無出去, 比佢好好休息, 精神都好得七七八八, 雖然佢哋出街係好開心, 但不停環境探索, 精神都會好攰, 令我重新考慮, 比咁多刺激兩隻老人家啱唔啱, 決定都係一星期出去四日好喇!
 |
| video |
我相信轉天氣對兩隻豬有一定影響, 最明顯係波波腳仔又變差, 明明之前都有 90%復原, 呢幾日又行到疙吓疙吓, 見到佢咁心都實晒; 都祇可以做保養, 食順勢藥, 今次用單方focus 喺關節痛, 再無其他辦法喇!
達達食咗中藥supplement'養氣'都有廿日喇, 一直無見有不良副作用, 我之前有擔心成份中有一隻藥會同佢唔夾, 以為可以放心喇, 好期望可以幫到佢唔再打乞嚏嘛; 可惜早兩日突然見佢又有抽筋嘅徵象, 又縮起手仔, 個心沉晒!
用順勢藥後已經兩個幾月無風無浪無抽筋, 見佢又開始咁我都唔識比反應喇😓!
呢段日子以來一切無改變, 祇係加咗食'養氣', 唯有煞停唔敢再去馬, 咁情況下連'健心'都唔會再比佢試喇; 對各種藥物supplement嘅反應真係每個身體接受唔同, 未試過真係無得估啦; 傾向再抽筋嘅真正原因我唔知, 希望唔會係病情加重, 萬望誘因係因為呢隻中藥supplement, 停服後就無事啦!
從阿女學reiki以來, 每次幫兩隻豬做reiki, 佢都係比一樣嘅comment, 話達達身體健康麻麻, 感覺仲比波波差; 當時波波已確診腎功能不全有蛋白尿, 而達達都無咩特別, 從未有醫生比佢健康情況有好負面評價; 走到今日, 已經明顯見到, 達達同波波嘅差別, 波波算係穩定, 但達達嘅健康指標就一直往下跌喇!
今晚, 阿女同達達做reiki時, 我自然慨歎生命嘅長短, 然後好自然對達達講, 叫佢陪媽媽耐D好嗎.....
但阿女話我唔應該咁講, 我哋祇求佢無痛苦, 開心咁每日活得好, 拖長而受苦係折磨, 唔要佢為任何人改變既定要走嘅路; 如果今世功德圓滿, 強留係唔好; 愛佢要依從佢嘅角度, 比佢順其自然, 好好咁行佢要行嘅路; 我哋做得嘅就盡量為佢做, 祇要好好照顧!
阿女話每次做完reiki, 都感覺佢有放鬆, 已經好好!
阿女有上禪修課, 佢睇生死同我真係有唔同....
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
