 |
| 相片連結 |
一星期忙碌嘅生活告一段落, 好感恩貓咪同兩隻豬仔精神都幾好, 我忙都祗係跑多幾步, 最多係加速腳步😄!
雖然都會覺得攰, 但最緊要無擔憂無煩惱, 攰就早D瞓覺, 仲瞓得好好!
阿女回歸, 我又一次完成託兒任務, 正常嚟講餵貓貓幾餐唔難, 畢竟年紀細無長期病患, 係有D腸胃敏感, 我最怕佢哋肚痾啦, 雖然問題唔大, 但無人睇住搞到污糟邋遢就麻煩; 今次好托頼, 貓貓狗狗都爭氣, 我安樂曬!
 |
| give me five |
兩隻貓貓都好乖, 亦好痴我, 傻貓b仲識give me five😻!
俗語有話高竇貓, 貓貓特別需要有自己空間, 但阿女呢兩隻貓貓係痴身怪; 每次餵完佢哋我要走時, 佢哋都會飛快去門前擋住曬, 搞到我想走好難, 但我掛住波波達達, 唯有狠下心腸講拜拜!
唔知係我想法唔啱, 還是自己性格, 我總覺得養毛孩要有足夠陪伴時間, 貓貓也好狗狗也好, 佢哋都有一樣期盼, 總希望媽媽陪伴吧; 一諗到佢哋一生大部份時間都係等待, 由早等到晚, 心都痛晒😖!
天氣開始涼, 踏入10月又係達達毛髮蛻變時間, 不過係壞嘅變化, 又開始變旱變差; 毛髮豐滿與否都無所謂喇, 外觀問題祇係小事, 最緊要身體平安啦; 波波腳仔算係好返, 佢行動無問題亦無吊腳喇, 不過感覺已經同之前有差別, 見佢便便時唔多夠力紮馬亦行得慢!
兩隻豬年紀大喇, 體力明顯比之前差, 呢一年感覺佢哋衰老得特別快, 整親腳仔都要咁耐先勉強叫做好返😒!
"歲月催人老, 時間不留人", 時間將一切不經意咁改變晒; 人生...仲可以問有幾多個十年? 兩隻豬應該無第二個十年喇, 我除咗珍惜同佢哋相聚嘅每一刻, 都祇可以接受現實, 係無可能留住時間!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
