 |
| 相片連結 |
一年四季裡面, 都係秋季對兩隻豬仔最重要, 因為可以出街行一轉; 春季太潮, 波波就算唔落地皮膚都會出紅點, 夏季太熱, 中暑要避免, 冬天凍到我自己都想窩喺被竇裡面, 出去食西北風無必要; 如果我上網公開咁講, 我呢D怪獸媽媽實比人鬧到番天😱, 不過喺自己嘅blog, 講咩都無緊要😜!
況且我豬仔嘅狀況係點, 無人比我更清楚, 安全最重要!
波波氣管差, 氣管收窄年紀越大越危險, 溫差濕度要控制好, 呢點極有必要; 達達依家心仔有病變, 簡單如梳毛剪甲抹面都變咗係挑戰😥, 隻惡女一發脾氣我唔投降都唔掂, 出外更要留意住唔比佢太激動, 一切更加要檢點; 兩隻豬, 要時刻留意住有無脷仔變瘀, 有無氣喘!
琴日早餐後, 同工人姐姐推車仔帶兩隻豬出外行一轉, 佢哋喺車仔上已經團團轉, 可能耐咗無出去, 感覺好新鮮, 我會盡量把握住好天氣, 等佢哋開開心心享受每一天!
達達眼仔睩睩兩頭望, 有開心嘅表現, 同喺屋企成日瞓好大分別; 波波雖然睇唔見, 但感覺佢都好悠然, 面上少咗以往戒備嘅表情, 好用心去feel!
見到佢哋都咁開心, 我試放佢哋落地行兩轉, 達達一貫暴衝, 好似個火車頭亂咁撞, 好怕佢拼盡全力心仔消耗太大, 又怕佢關節受損; 波波眼仔睇唔到後, 跑馬步已經同佢絕緣, 依家落地都呆企唔敢郁, 好似行一步都經過計算; 望住佢行到有D步履不穩, 戰戰兢兢咁我好心酸, 我明知無可能康復如從前, 以前健步如飛嘅姿態已不復見.....
唉, 我知我唔應該想當年...
 |
| 無復當年勇 - 2017年 video |
今早要燉湯比波波, 延至中午先同兩隻豬仔出去同太陽伯伯會面, 好彩有風吹住中午都唔熱, 今日純遊車河, 唔想一下間活動太多筋骨又勞損, 老人家真係要有特別打算.
呢一年, 感覺兩隻豬老得好快, 尤其精神體力方面, 好容易攰, 我要小心照顧, 希望仲有無限個快樂嘅明天, 開開心心過多一年, 再一年, 又一年......
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
