 |
| 相片連結 |
達達停用中藥「養氣」後, 又多返鼻水同乞嗤, 見佢面仔毛毛都變紅, 就知佢鼻水流到濕晒, 咁亦證明到「養氣」對治療呼吸道疾病真係有效!
無奈達達食咗呢隻中藥補充品, 好似誘發返抽筋, 比佢再食我有D擔心; 但由佢不停打乞嗤鼻水長流? 咁會好辛苦又影響佢胃口, 但再食又怕佢會抽筋, 進退兩難真係諗爆頭!
有時真係兩難, 我會認為抽筋比乞嗤傷害大, 但見佢打乞嗤打到猛"fing"頭, 咁辛苦都真係要諗諗辦法😖！
最後決定改變方針, 唔當日常補健品, 當係我食頭痛藥咁, 有需要時少劑量食兩三日; 起碼幫到佢暫時脫離乞嗤流鼻水之苦, 食咁短時間咁細劑量, 希望唔會誘發佢抽筋啦!
呢排兩隻豬仔一切算托賴, 可以輕鬆D keep 住同佢哋去行吓街街, 達達每次去完街都胃口大開, 每次開餐都食得好快!
正常咁開餐, 乖乖咁食晒, 似乎無必要大驚小怪, 之前見朋友喺FB貼狗狗食餐相片, 我就有感而發, 留言話一張咁普通嘅進食相, 包含意義好大; 經歷過毛孩無胃口唔肯食, 見佢自動開口, 食得痛快, 做媽媽有幾開心, 實在難用言語表達!
毛孩漸漸年紀老大, 又有長期病患, 正跟隨住自然生理時鐘循環咁行, 從前生活中嘅平凡, 曾經有過嘅''好煩'', 要想再見都真係好難!
想當日為三隻豬凖備開䬸, 佢哋團團轉跑到廚房門口, 又跳又叫催到我手腳亂晒, 今日呢個情境永不復見喇!
一切平常事, 原來每一件都係幸福泉源, 即使當日認為佢哋搗蛋, 今日回想留下懷念無限!
過去嘅一切, 警示我要更珍惜同佢相聚嘅每刻時間, 無論往後照護過程幾吃力艱苦, 我會提醒自己, 今日所做嘅每一件事, 都會係明日最寶貴嘅紀念, 會長存心間!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
