有緣再聚 (w/mp4 - Today, Forever Love)

轉眼達達已經離開咗3星期, 我一直感應唔到佢有返嚟, 咁都好, 切合達豬睇得開嘅性格, 可以灑脫咁放開過去; 之前撐咗咁耐, 都應該係因為我曾經講過, 依家陪我過生日只有佢,  為咗滿足我, 佢拼盡所有能耐堅持, 我好感謝乖女, 呢份愛我會永遠記住!

達達公主遷居

好鍾意呢個相架, 好靚!

休息咗幾日, 喺聖誕前夕, 為達達公主遷居, 移居到之前為波波準備嘅木盒, 當然一開始都有為達達考慮, 留咗位置比佢; 經過咗年幾分開, 達達終於同波波團聚; 空間唔大, 但迫迫哋更親蜜, 最重要係佢哋可以在同一空間, 再做一對神仙伴侶!
願兩隻豬仔有一個溫馨嘅silent night!

臨終前的十四堂課 - 轉貼

好長好長嘅一篇貼文, 但非常值得細讀; 文中談及生死嘅課題, 真係一世都未必可以參透, 尤其對於因為慢性病離世之前, 是否仲要過度治療, 還是順其自然, 的確係非常糾結嘅抉擇.....

難以面對

好似一場惡夢, 3隻豬仔都已經唔喺度

今日冬至, 大家開開心心過節嘅日子, 但我開始做一件明知自己會難過嘅事; 不過已經接咗達達返嚟, 依家8隻豬仔都留喺屋企, 陪住我往後每個日子, 仍有感到安慰!

最後一面 (w/mp4 - Never Be Forgotten)

過去幾日, 都無感應到達達返家, 可能達豬都係親近爸爸, 不過老公無咁敏感, 問佢都徙氣喇！
一直等到今日, 達達火化, 要接達豬返屋企啦, 好似發緊夢咁, 心情複雜 ....

不能填補嘅遺憾 （w/mp4 - 只要平凡)

達達離開咗有5日, 記得豆b同波波離開時, 我好似好多嘢塞住喺胸口, 好多嘢想抒發, 一篇又一篇blog密密發; 到今次達達離開, 好相反, 日常都唔願開口, 祇剩下掏空嘅感受; 失去達豬後, 先確認原來心中承載佢嘅份量重若千斤!

別了, 達達公主！（w/mp4- fly)

達達終於喺今早7:05am離開,  我陪喺佢身邊睇住佢呼吸變淺變慢, 到停止呼氣; 呢個係我一直期盼嘅離開過程, 無掙扎好平靜, 咁樣離開算係修得來嘅福氣!
為佢唔再堅持鬆一口氣, 但又好傷心面對別離!
祝福達達一路好走, 快啲去搵波波, 你哋已經分開咗一年多!

悲傷的生日

達達仍然瞓到昏沈沈, 維持住淺薄呼吸, 即使我用針筒嘗試餵少少水濕潤吓佢嘴仔, 佢脷仔想郁動都唔得了; 無數次叫乖女唔好再堅持, 唔好不捨唔使掛心, 但佢聽若罔聞好固執!

昏睡狀態

一連幾晚通宵守住達達唔敢瞓, 頭暈暈!
呢幾日心情大起大跌, 達達突然發病更急轉直下, 我好難接受, 無諗過別離一下間咁接近, 無可能!

撕心裂肺

星期日, 工人姐姐放假, 佢一早入嚟我房睇達達, 同我講出去喇; 然後望住達達問佢有好轉嗎? 我答估計情況唔樂觀, 佢即刻喊住同達豬say goodbye!

我好希望係我估計錯誤, 我好希望達達會過到呢關, 原來覺得自己已經識handle, 但到最後都一樣心痛到撕心裂肺，好肉赤已經奄奄一息嘅達達！

路都係咁行

 

深夜, 極度煎熬嘅一夜, 相信達達離開我嘅日子唔遠喇!

本來, 仍奢想佢有機會好返, 雖然過咗一晚佢無大進步, 但都有些微改善嘛, 況且一整日佢都表現平穏, 可以好安靜咁瞓覺, 表情放鬆, 我以為佢會過到呢關....

腳仔撐撐

經過咗憂心忡忡嘅一晚, 唔覺達達有大進步, 佢仍然郁動有困難, 想尿尿時會發出聲音, 瞓喺度腳仔撐撐!

見到佢兩隻腳都有郁, 依家仲有右前手硬曬, 不過琴日係半邊身僵硬, 兼且頭仔向一邊拗, 似乎今日就有好轉, 頭仔姿勢正常返, 亦無再流口水喇!

打破宿命

 

達達突然冧咗, 好突然！

早餐午餐如常食得好自然, 無扭計要餵, 自己乖乖食完, 隔咗一陣發出一啲怪声響,  以為佢要尿尿, 放佢落尿墊就突然跌低, 發覺佢一邊身偏側, 即刻抱起佢見佢狂流口水, 眼神呆滯全身乏力咁往我懷中跌....