深夜, 極度煎熬嘅一夜, 相信達達離開我嘅日子唔遠喇!
本來, 仍奢想佢有機會好返, 雖然過咗一晚佢無大進步, 但都有些微改善嘛, 況且一整日佢都表現平穏, 可以好安靜咁瞓覺, 表情放鬆, 我以為佢會過到呢關....
晚上阿女過嚟食晚飯, 幫佢做reiki時話佢接收得好古怪, 每次都係初步接受, 之後就停止接收, 阿女話唔知點解, 佢祇係唔敢直言吧, 我一聽佢咁講個心一下就沉曬!
如果仲有起息佢會一直扯能量, 會比自己壯大, 相反佢停止接收, 情況有幾壞我暸解!
到咗半夜, 達豬又腳撐撐, 佢有唔舒服時, 依家只可以咁表達, 我檢查佢無瀬尿尿, 但眼神渙散; 我抱起佢驚覺佢肌肉流失得極快, 一兩日間我竟然摸到骨杉杉, 我直覺佢快要走喇!
老公坐喺我身邊, 伸手向我接過達達, 抱住佢同佢輕聲講, 叫佢去搵波波玩, 然後....我見到老公喊!
結婚幾十年, 我見佢喊嘅次數半隻手都數得曬, 我知佢好鍚達達, 每日放工返嚟, 就係佢同達豬愛嘅互動時間, 要放開實在難!
好難過, 完全感受到佢嘅不捨, 喺呢個無眠嘅夜晚, 流涙眼看流涙眼; 坐喺達達身邊, 開始用transition ease舒緩佢不適, 輕輕同佢講, 你曾經講過, "個個嘅路都係要咁行, 唔使傷心嘛!"
所以乖女, 如果呢段路依家要終結的話, 你就放心去搵波波啦, 回復年靑嘅身體去走新里程, 答應媽媽要活得快樂呀; 爸爸媽媽當然不捨, 但會放手你唔使牽掛!
半夜三更發訊息比好朋友, 想佢為達豬做次傳心, 問吓乖女仲有乜嘢心願未達成, 仲有乜嘢我可以為佢做? 佢仲有乜嘢牽掛?!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
