一連幾晚通宵守住達達唔敢瞓, 頭暈暈!
呢幾日心情大起大跌, 達達突然發病更急轉直下, 我好難接受, 無諗過別離一下間咁接近, 無可能!
之後嘅三日, 達達都係昏睡狀態, 保持住平穩而微弱呼吸, 佢嘅表現話比我知恢復係冇可能, 但似乎佢仲未準備好, 未想走, 或者仍留戀呢個屋企, 留戀愛鍚佢嘅每一個人!
朋友傳心, 似乎達達知道自己將要走, 但琴日阿女同佢做reiki佢又肯接收, 令我又燃點起希望嘅本能, 不過我相信上天嘅安排, 如果達達好似依家咁, 平平靜靜離開, 我接受!
朋友同達豬傳心, 都話佢安然平靜, 仍要做靚靚公主, 咁我為佢著上條靚靚裙; 當然, 達豬永遠係最靚靚嘅達達公主, 無人會反駁, 毫無疑問!
我同達達豬講, 如果仲未凖備好, 可以隨意逗留, 媽媽仍會貼心照顧, 令你有舒服感受; 藥我繼續供給, 要保証你冇痛苦感受, 至於食物, 我真係唔知是否應該再供給? (睇書其實應該斷水斷糧, 但達豬仍有呼吸, 仍未想走啊, 我狠不下心!)
如果媽媽嘗試比你食物, 你自己決定是否接受, 好嗎?
之後, 當我將針筒靠近佢口, 佢有時伸出脷仔我就泵, 有時冇反應我就徹走!
今次有調整情緒, 喺佢仲清醒時有同佢一齊回顧往日嘅歡樂時光, 每一個難忘片段, 我叫佢要記住, 爸爸媽媽永遠愛乖女, 無論佢是否在身邊, 愛永遠靠近!
而我亦唔會忘記, 呢一段喺我生命中最美好嘅歲月, 因為有達豬嘅參與, 仲有豆b同心肝椗波波, 一段任何嘢都替代唔到, 深愛嘅感受!
人活著總係要經歷離別, 但我真係唔捨得分手⋯⋯
 |
| 老公默默守候 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
