星期日, 工人姐姐放假, 佢一早入嚟我房睇達達, 同我講出去喇; 然後望住達達問佢有好轉嗎? 我答估計情況唔樂觀, 佢即刻喊住同達豬say goodbye!
我好希望係我估計錯誤, 我好希望達達會過到呢關, 原來覺得自己已經識handle, 但到最後都一樣心痛到撕心裂肺，好肉赤已經奄奄一息嘅達達！
依家屋企祇剩低我同達達, 我陪喺佢身邊, 細細聲同佢傾談, 好奇怪佢有眼神表達; 達達已經失去聽力一段好長時間, 但今日佢好似接收到我同佢講嘅說話, 會用眼仔回應, 每次佢表示有不適, 我同佢轉換位置, 然後輕輕安撫, 佢都會回復安靜, 難道呢啲又係迴光返照嗎?!同乖女好好傾談, 佢好似特別明白, 有比反應
琴晚一家人商談, 究竟應唔應該送達豬去醫院, 我決定有錯嗎? 老公同阿女都唔讚成送佢去住院, 除咗唔想佢遭受折騰一番, 亦覺得勉強留佢孤零零一個吊命無必要了, 佢情況係根本唔會好返!
我深信呢個亦唔會係達達嘅選擇, 與其孤零零一個賺取多幾日時間, 不如帶住愛同溫暖一路好走吧!
好怕自己估計錯誤, 都比滴雞精佢濕住嘴仔, 唔想佢腸胃有負擔, 亦唔想佢餓住肚仔啦!
真係好難忍住唔喊, 唯有猛寫心中感受去舒發, 面對生離死別最難!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
