過去幾日, 都無感應到達達返家, 可能達豬都係親近爸爸, 不過老公無咁敏感, 問佢都徙氣喇！
一直等到今日, 達達火化, 要接達豬返屋企啦, 好似發緊夢咁, 心情複雜 ....
一早起身做準備, 鮮花, 食物; 要焗愛心蛋糕, 要記得風乾佢好鍾意嘅羊肉, 仲有整佢最鍾意嘅蕃薯同雞蛋, 食物雖然簡單, 但愛意無限; 我無宗教信仰, 就集中喺食方面喇!
達達離開咁耐以來, 唯有今日懨懨嘅感覺一掃而空, 打起精神從新出發; 今日會再見到達達, 但見過達達公主最後一面之後, 就只能將佢放入心間!
提早到達善終公司, 希望爭取多啲相聚時間, 一切儀式一如以往, 到悼念室同乖女最後相聚,
輕輕撫摸佢仍然柔軟嘅毛髮, 沈睡中嘅乖女, 面容平靜, 仍係我哋最靚靚嘅小公主達達!
相聚嘅半小時, 感覺祇係一瞬間!
依依惜別, 親手按下電制點火, 見到熊熊烈火嘅剎那, 淚如雨下, 一家人都忍唔住喊.....
我哋等候埋骨灰, 同一日帶達豬返屋企喇; 捧住個骨灰盅, 心情沉重難以形容, 同達達分別咗幾日, 個心一直懸空, 到今日手抱住佢嘅骨灰, 個心踏實又傷痛, 真真實實要接受乖女喺幾日間, 從活生生嘅肉身化為灰燼, 我真係希望呢個只係一場惡夢!
之前工人姐姐唔可以去送別波波同豆b, 因為屋企仲有豬仔要佢留守看顧, 今次送別達達佢主動要求參與, 所以今次除咗老公同阿女, 仲有工人姐姐同行; 我一向婉拒親朋好友送別狗狗, 唔想佢哋睇住我喊, 不過工人姐姐多次陪我一齊喊, 佢已經見慣!
呢個姐姐日常做嘢雖然多甩漏, 樣樣都要跟, 但佢對3隻豬算係有耐心, 日常都感覺佢愛錫3隻豬仔, 我信佢係真心; 正係呢一點, 支持我將佢留咗3個合約共6年, 見證住3隻豬仔一個接一個往汪星球, 今日佢親眼見到達達火化好傷心!
已經踏入第4個contract, 今後屋企再無狗狗, 大家要重新學習調整生活重心!
 |
| mp4 - Never Be Forgotten |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
