達達終於喺今早7:05am離開, 我陪喺佢身邊睇住佢呼吸變淺變慢, 到停止呼氣; 呢個係我一直期盼嘅離開過程, 無掙扎好平靜, 咁樣離開算係修得來嘅福氣!
為佢唔再堅持鬆一口氣, 但又好傷心面對別離!
祝福達達一路好走, 快啲去搵波波, 你哋已經分開咗一年多!
達達堅持咗咁多日, 原來真係為咗陪媽媽過生日, 狗狗有時比人更重情感, 咁有性唔飲唔食挺咗咁多日, 叫我點可能唔心痛傷心? 挺到今日佢心願已了, 先可以走得放心!
琴日佢都唔肯走, 可能唔想日後我每次生日都傷心, 記得我媽媽當日同我永別, 都挺到我結婚紀念日之後一日; 達達應該同我媽媽一樣心思細密, 考慮周詳好貼心!
一連多日守候喺達達身邊, 密密用滴劑transition ease 幫佢過渡彼岸可以順利平穩, 又一次經歷生命流逝嘅過程, 還好感覺達達無好唔舒服; 捉緊乖女雙手, 內心滿滿不捨, 但自問今次我做得比以往都用心!
我有好好珍惜最後時光, 有同達豬一齊回顧過往, 有分享有道別, 有再三叮囑呢個屋企永遠係佢嘅屋企, 記得同豆B、波波多啲返來!
離別總係傷心, 永別更難過, 一想到從今屋企再唔會見到隻惡女, 無咗把惡騰騰嘅聲音陪伴我, 淚流成河; 我人生最美嘅一段, 將會隨住達達嘅離開, 都永遠離開我!
死亡, 離開嘅只係肉身, 我會學習無咗3隻豬仔嘅存在, 但曾經有過嘅過往, 有佢哋嘅愛同在, 仍無怨無悔付出所有愛!
約咗善終公司傍晚接達達, 剛剛交托咗比個叔叔, 呢個係我最崩潰嘅時間, 要面對乖女嘅肉身一離開屋企門口, 失去佢已成事實, 生離死別最悲哀!
 |
| mp4 - Fly 紀念最美麗嘅達達小公主 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
