達達仍然瞓到昏沈沈, 維持住淺薄呼吸, 即使我用針筒嘗試餵少少水濕潤吓佢嘴仔, 佢脷仔想郁動都唔得了; 無數次叫乖女唔好再堅持, 唔好不捨唔使掛心, 但佢聽若罔聞好固執!
都堅持咗咁多日, 阿女猜想會唔會為咗陪媽媽過生日? 不如早啲買個蛋糕慶祝, 等佢安心!
不過提早慶祝, 達豬都似乎唔開心, 佢覺得提早唔算係媽媽生日? 一直挺到今日, 會唔會過咗今日佢肯走? 呢個女好固執! 好難想像, 一個小小嘅身體, 有咁強大意志可以挺咗咁多日, 應該係有濃濃厚愛支持著, 乖女嘅心意媽媽永遠記得!
達達好貼心, 但呢份心意令我更傷心!
多謝好朋友琴日同達達再傳心, 連結上達達, 呢個女真係好倔強, 估唔到一向灑脫嘅達達, 面對離別會咁困難, 不捨嘅情緒竟然可以令佢意志力變得咁頑強, 強韌到唔靠食水同食物,可以挺足7日, 真痛心!
今次太突然發病, 一下就去到好差程度無法收拾, 假設生命可以勉強挽留, 日子都唔會長久, 基本生活質素亦無可能保有.....
一早達達已失去聽力, 今次stroke亦徹底失去視力同活動能力, 佢會唔會樂意瞓喺床上毫無尊嚴咁隨意便溺 ? 想轉個身郁吓都無能為力?!
達達公主一向咁驕傲......
即使爸媽再加寵愛, 咁樣生存真係太痛苦, 一向話狗狗對生死唔在乎, 只在意當下活得好!
無數次規勸無數次解釋, 達達請你放手, 到下個里程搵你嘅幸福, 媽媽唔想你承受呢種痛苦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
