轉眼達達已經離開咗3星期, 我一直感應唔到佢有返嚟, 咁都好, 切合達豬睇得開嘅性格, 可以灑脫咁放開過去; 之前撐咗咁耐, 都應該係因為我曾經講過, 依家陪我過生日只有佢, 為咗滿足我, 佢拼盡所有能耐堅持, 我好感謝乖女, 呢份愛我會永遠記住!
 |
| 之前我陪佢過生日仲好好的, 只過了兩星期..... |
不經不覺, 發咗千幾篇blog, 網上同大家分享有十年多, 隨住我生命裡最後一隻pom pom達豬離開, pom pom 豬樂園都係時候同大家講再見了!
人生, 有幾多個十年? 喺過去十年, 好幸運能夠有三隻豬仔陪伴, 有大家嘅支持, 有因為寫呢個blog認識已成為朋友嘅你哋, 有你哋一直關心三隻豬仔, 我好感激!
從來無諗過寫blog會豐富咗我原本平淡嘅生活, 為我生命添上豐富色彩, 令我都有行過一趟美好嘅人生旅程, 依家一旦要停筆, 真係有滿滿不捨同難過!
要做好斷捨離真係唔容易, 3隻豬仔嘅遺物都未能好好整理, 每每一開始就唔可以繼續落去, 要表達呢種感受, 好難用蒼白嘅文字; 不過, 最最不捨嘅豬仔都離開咗我, 人生必然會遇上好多無奈, 就借用詩人徐志摩名句, 好文藝咁講😜, " 悄悄的我走了, 正如我悄悄的來; 我揮一揮衣袖, 不帶走一片雲彩!"
最後為3隻豬仔再做一個視頻, 同大家再一次回顧佢哋過往嘅日常, 往後就將一切有關愛同美好情感都放到記憶裡!
 |
| mp4 - Forever Love |
選咗今年最後嘅一日, 2021除夕, 為pom pom 豬樂園劃上句號，祝願大家喺新嘅一年, 所有期待都能出現, 所有夢想都能實現, 所有希望都能如願; 結束一年嘅奔波, 驅散過去嘅陰霾, 迎來一片陽光, 開啟新嘅一頁 !
 |
| mp4 - Today |
別了依然相信, 以後有緣再聚,
未曾重遇以前, 要珍惜愛自己,
在最好時刻分離, 不要流眼淚,
就承諾在某年, 某一天某地點, 再見!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
