 |
| 少少戰利品 |
今日同朋友A結伴去咗寵物展, 其實每年嘅寵物展都大同小異, 基本上分別唔大, 不過同朋友一齊去行吓都算係一個唔錯嘅節目!
今次地點係灣仔會展, 唔駛山長水遠去到機場咁遠, 又攞到免費門票, 諗住買唔到嘢都無所謂啦, 當逛吓街睇吓有乜新產品囉; 係無乜期望嘅心情下, 竟然不經不覺咁都行咗4個鐘!
今日收穫唔算豐富, 只係買咗幾件衫仔, 幾包小食, 草本天然殺菌噴霧 ,天然防虱噴劑, 同兩罐狗狗人參雞湯!
依家嘅狗狗真係幸福, 人有嘅佢哋都有, 連補湯都出埋罐頭, 真係佩服呢D商人嘅頭腦, 佢哋睇準依家寵物已經同以前地位唔同, 我地都當咗佢哋係仔女, 當然都想比最好嘅佢哋啦!
睇過補湯含有嘅中藥成份, 識D唔識D啦, 但我都有信心比D豬仔試吓, 因為呢隻湯係由香港CAU獸醫診所李恆年醫生(我睇過佢出嘅書, 佢係支持homemade diet嘅少數醫生之一)同中醫師劉克家共同研發, 佢哋話成份天然可靠, 可以安心服用, 咁都係嗰句啦, 唔係日日飲用, 間中進吓補, 都有益無害嘅!
依家人類都好推崇中西醫結合治療, 狗狗都好似開始邁進呢個方向, 見到狗狗都開始有中醫, 針灸, 推拿等等; 亦見到好多寵物補健品都用上中草藥, 可見中草藥都被肯定咗對動物都有效用!
今日我都有睇下D補充品, 反正一個品牌食咗一段日子後, 我都一定會轉一轉, 分散吓風險嘛!
今次睇到兩個產品我幾感興趣, 一隻係狗狗嘅靈芝蟲草配方, 佢用咗6種靈芝, 就好似我自己食緊嘅五色靈芝咁, 加上蟲草, 應該係一個唔錯嘅補健品. 其實3隻豬仔都有食緊呢D成份嘅保充品, 不過不同生產商用不同份量調制, 效果可以好大分別; 呢個產品嘅生產商係朋友A都知道嘅一間藥業公司, 咁信心又加強咗!
今日同佢哋推廣嘅同事傾過, 都覺得有信心, 佢哋比咗兩星期份量嘅sample我, 因為呢隻產品強調可以改善氣喘, 咁又好似幾適合隻豬豆, 雖然佢無氣喘, 但我希望可以改善到佢氣管嘅問題; 等我比半個份量佢試吓先, 睇吓效果係咪明顯!
另外一隻係鹿茸QQ, 主要嘅成份當然有鹿茸, 仲有鹿血同人參, 都係一隻用天然成份補充葡萄糖胺同軟骨素嘅產品, 不過我剛好買咗關節補品, 下一回有可能轉用呢隻, 等我再研究一下先啦!
行咗今次寵物展, 都叫做有D得著啦, 雖然無D豬仔得著咁多:)
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
