 |
| ３隻爛瞓豬仔 |
琴晚見到波波神態有d唔係好自然, 行得好猶豫咁, 都格外留意佢嘅動態; 今早食早餐後, 就發覺佢身體有少少震, 伸手同佢除個口水肩都迴避, 咁我諗佢骨刺又觸到佢痛痛喇; 死啦今次同上次距離只係一個月左右, 咁都痛得好頻密喎, 雖然今次唔算嚴重, 佢仲有胃口, 行動正常, 比佢食咗次止痛藥, 中午佢無事一樣喇, 但都係擔心啦, 好似藏住個計時炸蛋, 一日唔移除始終問題都係存在, 都唔知幾時會爆, 只可以希望呢個炸蛋係無殺傷力嘅啦, 唉!
達達豬仔食番正常份量嘅藥後, 毛毛異常情況無再惡化, 春天到喇, 希望快d見到佢有好轉啦!
豆豆每日都keep住吸15分鐘蒸氣, 佢依家好習慣喇, 仲識張大口吸氣添, 佢本能感覺到吸氣係會令佢舒服啦; 雖然咁做都係治標唔治本, 但能夠令佢舒服D, 唔好成日呼吸到嘓嘓聲, 瞓得舒舒服服就大家都安樂D喇!
瞓得好對佢哋健康好重要, 我希望佢哋瞓多 D, 每日餐後, 我都開住狗狗音樂等佢地relax D, 咁佢哋就好快瞓著; 食飽就瞓, 真係名符其實養豬仔咁喇, 哈哈!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
