停一停, 諗清楚!

達達咁攰仲要死撐!

琴日舊同事AL嚟探我同D豬仔, 波波細細個就認識呢個姨姨喇, 狗哋D身份証都係姨姨嘅老公幫忙, 先可以做到, 靠我呢D電腦白痴, 佢哋無可能可以持有香港身份証啦!

我呢個同事有D似以前嘅我, 都係有D驚狗狗, 不過佢又唔會好驚我D豬仔, 波波達達一番嚟我度, 佢就見過佢哋, 可以話睇住佢哋大, 對佢哋會有一份特別感情!


琴日兩隻豬算係好乖, 只係初期波波表現得較為興奮, 不時跑嚟跑去, 達達豬就一如以往, 自己唔敢行就吠, 不過呢個狀況都持續咗唔係好耐, 而最叻叻係佢哋好守規矩, 無令媽媽尷尬; 尿尿會去片片, 食午餐時如常坐定定等指令, 叫佢哋去食先行埋兜糧度, 真係好抵錫!

同事見呢兩隻豬仔咁有教養, 又精靈可愛, 佢更加心動, 想養番隻; 佢話之前都有考慮過, 亦同老公去睇過狗狗!

當然我呢個同事絕對有養狗狗嘅條件,  仔女都大喇, 唔需要再特別去照顧, 最重要係同我一樣, 佢依家都唔再係職業婦女, 是以有的是時間; 但養狗狗真係唔可以一時衝動, 必須冷靜落嚟, 停一停, 諗清楚!

做一個養狗狗嘅決定, 真係要考慮週詳, 因為講緊係十幾年嘅責任承擔, 唔可以單見到狗狗可愛, 就衝動行事! 狗狗係一條生命, 同人類一樣, 有生,老, 病, 死!   而佢眼中嘅我呢兩隻得意豬仔, 在一個無養過狗狗嘅人嚟講, 點會想像到我背後曾經付出過幾多?

我希望佢諗清楚後, 仍然決定踏出呢步, 其實對佢都係一件好事, 一來有一個精神記托, 二來要強逼自己出去遛狗, 有適當運動, 對健康都有裨益!
期望我班豬仔遲吓會有新朋友仔, 我相信只要佢考慮清楚, 佢一定會係一個好好嘅狗媽媽!

刺激過後, 兩隻豬都攰喇!

當日AL老公幫兩隻豬整嘅兒童証同成人身份証

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！