 |
| 唔駛著住衫, 即刻精神晒! |
每次要影有主題嘅相, 我都覺得有難度; 只靠一個預先乜都set好晒auto嘅相機係咁按快門, 又無燈光setting, 要影得靚真係好難! 無專業相機(有我都唔識用, 有相機無技巧都係等如零, 哈哈!), 仲要配合住有限嘅道具, 自然要就住角度, 又爬又跪, 真係幾辛苦架!
同樣要佢哋著住衫正正經經坐定定, 都係難為咗佢哋, 所以不時要好誇張咁讚佢哋乖乖, 又要不停比小食, 遇上佢哋唔合作, 都唔可以鬧, 真係一個高難度訓練自己EQ嘅項目!
波波同達達算係好習慣比我影相, 佢哋都算合作, 只要拎住小食吸引佢哋注意力, 然後每隔一小段時間比佢哋食吓, 佢哋都唔會走來走去嘅; 豆b就真係攞命, 拎住小食引佢, 佢會飛撲埋嚟, 唔會坐定不特止, 仲要踢到D道具亂晒龍, 其他兩隻豬又會走埋一份, 咁就攪到打大風咁, 戴住嘅頭花唔係移晒位, 就係唔知飛咗去邊! 好多時都會見到初頭影嘅, 同後來影嘅, 所有嘢擺放位置都唔同晒!
在我嚟講, 同狗狗影相真係一個高難度挑戰, 因為一定唔可以對佢哋發脾氣, 幾唔like都要忍耐; 每次影完都同自己講下次唔再影喇, 都唔知咁辛苦為乜? 但影完睇番就每次都覺得幾辛苦都係超值, 一時嘅忍耐, 換嚟無數次回心微笑, 每次睇番D相我都好開心. 就係咁令我一次又一次咁影落去!
呢兩日天氣回暖, 幾隻豬仔都唔駛再著住衫, 即刻生猛晒, 今日同佢哋影咗D生活相, 影呢d就全無難度喇:)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
