 |
| 聽到去街街幾開心! |
春天嘅天氣變化真係好大, 上午覺得都幾暖, 下午就吹起北風喇, 不過都好過整日潮潮濕濕, 渾身唔舒服! 潮濕係狗狗皮膚嘅大敵, 是以呢幾日都要開住抽濕機, 咁兩隻豬仔會舒服D!
下星期又約咗D姐姐嚟剪毛, 咁嘅天氣都係剪短少少比較好打理,不過我都係唔會剪好多嘅, 呢個真係好講個人喜好同選擇, 有人鍾意剪到好短, 又有人鍾意剷光!
講真剷光真係唔太合適, 因為松松係靠一身毛髮去保護自己嘅皮膚, 同短毛狗狗皮膚構造都唔同, 如果認為炎夏剷清光佢哋會較為涼快, 可能得到反效果, 烈日下容易晒傷添!
因為我狗狗有甩毛情況, 我常常上網搵資料, 原來同松松剷毛都係一個誘因, 好多時毛髮從此就唔會再重生, 當然呢個唔係100%會發生, 我嘅狗狗從來都無剷毛, 都遇到咁戟手情況, 但唔想見到萬一, 都係博唔過啦!
我始終覺得養嗰個犬種, 就盡量保留番佢哋應有嘅型態, 松松一身豐滿披毛係佢哋嘅代表, 尤其係前胸好似口水肩咁靚嘅毛毛, 真係應該保留, 不過適當修剪都係有需要嘅, 都要整整齊齊嘛!
今次會同波波扮靚靚, 至於達達, 就唔敢莽動喇!達達食番正常份量嘅藥都有個多月, 但毛毛生長都未見明顯效果, 之前發覺佢毛質變滑咗少少, 仲以為有轉機, 原來係空歡喜! 見到佢越嚟越薄嘅毛髮, 有D擔心今次隻藥可能對佢再無效用喇:(
唉, 算啦! 一切都有定數, 做晒要做嘅嘢, 除咗等, 都無可奈何啦!
雖然天氣唔好, 都同佢哋出去行咗一陣, 但就無比佢哋落地行喇; 依D咁嘅天氣, 地下又濕又滑, 最多虫仔蜱虱, 惹到就麻煩喇, 都係坐私家車游吓花園, 要跑唯有係屋企隧道走番兩轉啦!
 |
| 幾日無出去, 困到吽晒😅 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
