阿Q精神

從呢個角度去影, 達達毛毛睇嚟都未係好差!

今日同達達豬沖涼, 從依家開始, 又要用dermagic shampoo每兩星期同佢沖涼, 進行呢個生長毛毛嘅療程喇! 沖完涼同佢影番幾張相, keep番個file啦!
每日睇住佢毛髮轉壞, 做咗咁多嘢都枉然, 真係好氣餒!

我一直堅持信念, 要小心觀察; 狗狗唔識同我講佢有咩嘢唔舒服, 我一定要小心留意住佢哋有乜嘢改變, 務求做到病向淺中醫, 我深信無論有乜嘢病, 醫得及時一定有良好嘅效果!

可惜無論我幾小心, 幾早發覺佢哋出咗問題, 幾及時去求醫, 搵幾多資料, 跟住指示做得再多, 結果都係無幫助!
我只係一個常人, 如果話我無失望, 都只係欺騙自己, 俗語話
"針唔到肉唔知痛", 每每用局外人身份去睇同一件事, 感受一定唔同!

琴晚同達達梳毛, 驚覺佢兩隻耳仔D毛轉黑晒, 我每日都好留意佢毛毛嘅轉變, 一日前都係好正常嘅顏色, 點知可以咁突然!
有形容人類遇到重大困難, 一夜白頭; 我一直以為呢個只係形容詞, 原來係真有其事!

當下個心真係沉晒, 開始問自己做咁多嘢有乜用? 要嚟嘅都係要嚟, 咁費心傷神為乜??

波波無端端又有骨刺, 我吸取過去安安曾頸椎骨節塌陷嘅經驗, 一開始就用一D稍高嘅糧兜, 等佢哋食嘢唔駛太彎低條頸, 亦控制好佢哋嘅體重, 但結果係點? 都係出事!

再講豆b, 我留意到佢氣管有問題, 比佢聞蒸氣咁又點? 日後佢年紀漸長, 更嚴重嘅狀況可能都會出現, 根本係無解決到問題!

達達情況就逼在眼前, 每日都叫我失望! 我好想放棄!!!

冷靜落嚟, 試下將自己抽離去睇!

波波知道有事後, 我識同佢保養, 無比佢再跳嚟跳去, 可能情況唔會變壞, 咁結果都算係正面嘅!

豆b氣管問題, 比佢聞咗蒸氣, 雖然係治標唔治本, 但起碼佢會舒服咗, 咁生活質素有所提升, 呢個都係好嘅結果啦!

達達嘅問題, 可能係同舊年一樣, 一定要咁樣走落去, 又未駛咁絕望; 如果我乜都唔做, 可能根本連長番毛嘅希望都無呢!

再想深一層, 脫毛症呢個病只係一個cosmetic disease, 只要佢健康快樂, 甩光毛又如何, 總好過其他器官有病, 要佢受苦嘛!
過往叻叻甩光晒毛毛咁又點, 一樣無損我對佢嘅愛, 我從來無因為佢無晒毛毛唔再靚仔而唔錫佢, 達達都係一樣, 無論佢日後變成點, 佢都係我寶貝達達豬!

世上每個生物, 都要經生, 老, 病, 死嘅過程架啦, 總無可能無風無浪, 無病無痛咁過嘛! 就算係死物, 都會破爛需要修理啦, 點可能一直完好無缺呢?
深呼吸一下, 又再嚟過! 幸好我仲有D阿Q精神, 成日開解自己, 唔係走咗入死胡同, 情緒病殺埋身就死得喇, 哈哈!

實情佢嘅毛毛無咗一半喇, 有好多空窗位!

凊楚睇到疏疏落落

耳後毛毛突然變咗黑色

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！