好勤力咁幫達達行呢條復康嘅路, 希望有成果啦!
今日又幫達達浸微泡浴, 利用水療加速新陳代謝, 加強佢血液循環; 眼見咁多狗狗脫毛都靠浸微泡浴, 得到毛髮重生, 我唔敢懶 :)
咁多人推崇微泡浴, 又見咁多成功嘅例子, 都應該有一定療效, 再睇波波同豆豆, 又確實毛髮都比以前豐滿, 我對呢部微泡浴機有更大嘅期盼; 勤力D浸密D, 希望真係幫到達達豬啦!
有咗帶氧微泡浴嘅幫助, 但願佢呢條脫毛路唔會太難行 :)
達達椎間盤問題, 我有幫佢照紅外線燈同用順勢治療; 佢似乎頗受落另類療法, 自從加番順勢藥後, 佢腳仔好番, 無成日震喇, 今次唔敢咁快減藥, 更唔敢停啦, 計劃食兩三個月, 等穩定後再減!
呢隻豬好曳曳呀, 脚仔好D就鬼咁生猛, 喺度猛划, 明知係唔應該比佢咁用力, 但叫唔停啦 😞
除咗繼續食藥, 順勢治療嘅醫生都建議多方面強化療效, 補充品唔少得啦; 針對性嘅產品我已經比咗 VETRI - DISC, 裡面有齊醫生指引嘅成份, 唯一仲有一樣, 要獨立從美國訂番嚟, 要多謝V今次再一次幫我!
 |
| 原來達達身長同盒紙巾一樣 :) |
不過呢隻 PS supplement係用作補腦, 我唔係好明同椎間盤有咩聯繫? 上次帶達達睇專科醫生, 都係開咗一隻比老年狗狗補腦嘅藥, 咁我諗兩者一定有相關啦; 同A傾起佢話會唔會係神經傳導嘅問題, 呢方面我係全無概念㗎 ;p
 |
| 好鍾意呢個紙巾套"Love me, Love my dog" |
又上網搵料, 原來呢隻supplement嘅成份係可以影響腦內化學訊息嘅傳遞, 仲可以控制物質進出細胞, 釋放神經傳導物質等, 咁專門嘅解說我真係一知半解, 唯一接收到嘅係幫到神經嘅問題啦 ;)達達情況係椎間盤出事引起反射神經遲緩同後盤無力, 咁都應該係啱食喇! 又再睇睇成效, 如果食咗效果良好, 就慢慢quit藥啦!
仲有波波, 佢眼仔問題都令我好困擾, 話佢有事又唔似, 醫生check完都話無問題; 但話佢無事咩, 佢又眼淚汪汪好似極敏感於光線😟
至於佢耳仔問題, 就比以前進步好多, 只係間中先會猛挍啦!
Mi又再比咗D順晒藥我, 話比波波試試睇吓又如何, 耳仔暫時無問題, 留住看門口即可; 但近日隻豬好似有眼癢會用手去卒, 咁我先試眼藥, 希望食幾日就無晒事啦!
我真係幸運, 有Mi 同V兩位好朋友幫忙訂藥訂supplement, 仲比我好多意見, 佢哋真係我D豬仔嘅貴人 :)
仲有A同我share好多健康資訊, 我哋可以商商量量, 希望可以為毛孩搵到最好嘅選擇, 佢仲幫我訂日用品同靚衫比3隻豬仔啦, 哈哈!
希望3隻豬唔會辜負大家嘅厚愛,要身體健康啊!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
