 |
| 等緊見醫生 |
個booking係下午, 今日一起身我已經好nervous, 一個早上痾咗十幾次, 真係攞命!
原來隻豬豆喺我心中份量都唔細, 一有事就發覺都係夭心夭肺啦！
等到差不多約定時間, 就急急脚走人, 今日有老公陪我一齊, 我呢個路盲少咗擔心會唔識搵; 一上的士個司機都係要問, 佢話我哋住呢頭會清楚點樣去喎, 乜依家D的士係咁嘅咩? 我住呢度唔代表我日日行相同嘅路, 你估早上番工咩, 不過就算真係番工, 問著我都係死!
第一次到太平道動物醫院, 真係好大規模, 唔怪得有話係寵物養和, 真係無講錯到; 老實講之前對呢間醫院印像都好有保留, 網上都曾有劣評令我却步, 如果唔係上次達達我都唔會避開唔去啦; 但豆b情況比達達差, 傷腰椎會後脚有事, 頸椎嘛、影響四肢架, 點都要去呢轉啦; 但今次親身感受, 印象係非常良好!
首先如果自己守時, 到咗約定時間, 係唔需要等到天荒地老 :)
我去做好登記手續, 下一個就已經輪到, 真好！
入去見醫生, 講清楚豆b呢兩日嘅舉動, 仲有氣管問題; 醫生check得好詳細, 雖然係屬神經科, 少不了要check脚仔反射問題, 但豆b喘氣真係好勁, 就要check埋眼仔鼻孔同聽心肺!
醫生話有可能頸嘅問題都有影響佢血液循環唔順暢, 呼吸會差咗, 但佢先天氣管應該好弱, 有可能下塌嚴重, 以致佢一緊張, 興奮, 疼痛都影響佢呼吸困難, 所以我見佢伸長晒條變色嘅脷仔:(
但要確診佢氣管有幾差, 要照x-ray確認, 目前佢頸椎有事, 就無可能做喇!
我最擔心係佢心臟問題, 氣管差年紀漸大都離唔開呢條路啦, 但醫生話目前心肺仍然良好, 鬆一口氣喇!
 |
| 睇完等緊攞藥 |
要確診就一定要做磁力共震, 但豆b氣道嘅狀況, 要做係無可能, 亦唔會建議去冒險做 !
麻醉呢關佢好難過渡, 麻醉係可以做, 但要佢醒得番就好似賭彩數!
還幸豆b目前情況唔太壞, 我哋都睇得早, 就先食藥希望幫得到啦!
準時食藥, 嚴格困籠, 食嘢就番頭仔嘅level, 呢D我一早都有做 :)
 |
| 如果條脷仔D顏色日日都咁靚就好喇！ |
醫生講解同檢查都詳細, 無外間傳說有"搶錢"嘅舉動, 即使有需要嘅檢查都考慮到身體可唔可以承受到, 唔會亂take risk, 比我嘅感覺係有為病患設想啦！
呢間5星級動物醫院比我感覺良好, 醫生護士都好友善, 臨走大家都叫豆b加油快D好番, 感覺好warm啊！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
