心情極度惡劣, 三隻豬輪住出事, 無一日安寧!
琴日豆b有D異常, 開餐都無大反應, 往日見我入廚房, 佢跑去門口等食永遠係第一名; 琴日午餐見佢仲窩喺床仔咁安靜, 都心知不妙喇!
放好飯碗, 隻豆慢條斯理咁行出嚟; 尤幸胃口正常, 但當我抱起佢抹咀, 佢尖叫!
第一時間幫佢檢查, 手腳全身咁按壓, 搵唔到問題, 唯有再觀察; 佢整日都瞓覺, 比平常少郁動, 但胃口同大、小便都正常, 量過體溫無發燒, 唯有比佢好好休息; 狗狗嘅自癒能力比人高, 希望佢休息後會無事啦!
首先懷疑又係脊椎出事, 但佢後腳反應正常, 再細心留意, 似乎係條頸出事, 噢! 天呀!!
見佢個頭仔有輕微側住, 條頸有D梗梗哋, 行動比正常緩慢, 都應該係椎間盤出咗問題, 不過今次唔係腰椎係頸椎, 仲死 :'(
即刻同佢照紅外線燈, 舒緩痛症!
依家回想幾日前深夜喘氣, 會係嗰時整痛條頸? 痛到透唔到氣?
狂挍後耳? 係挍頸唔係挍耳仔?
但之後佢又無事, 還是病徵唔明顯我無留意?
千萬個問題但再想都係無意義!
三隻豬, 齊齊有甲狀腺低下症, 又一齊椎間盤出問題, 係我照顧不週? 還是係遺傳問題?
個心真係沉咗落谷底, 照顧一隻有病嘅狗狗已經壓力好大, 點解仲要三隻一齊???
沮喪、無力、百感交集, 望住呢3隻豬仔, 叫我點撐落去?
豆b食藥後似乎止到痛喇, 抱起佢檢查無再叫出嚟, 叫自己先冷靜落嚟逐個部位慢慢睇!
用手按壓佢頸椎, 佢係有緊張嘅反應, 其他一切尚算正常; 咁即使係頸椎出問題, 都應該係第一級! 波波上次腰痛, 睇醫生後係食止痛藥加困籠休息, 大概兩星期等自我康復!
達達無痛就無須止痛藥, 比咗維他命B雜同老年狗狗補腦藥, 話幫到修護神經同強化血液循環; 因為達達有影響到反射神經遲緩, 比波波嚴重, 但主力治療方法都係困籠!
 |
| 入房瞓困籠 |
今次豆b情況係有痛, 其他未發覺有異狀, 係頸部有D梗, 咁都係先困籠; 即使去睇醫生, 相信都同上兩次一樣比止痛藥, 但主要都係困籠等佢慢慢康復啦!
今次手頭上有達達嘅椎間盤藥物, 即刻餵比豆b, 希望困籠休息再加順勢治療會幫到佢, 再小心監察有無變差, 一有唔妥就去見醫生喇!
豆b都要開始食vetri-disc, 仲要同達一樣齊齊食PS補腦嘅supplement，希望幫到神經系統!
沒完沒了咁擔心, 又要set住時間餵藥, 身心疲累; 好似跌咗落一個無底深洞, 無能力爬番出嚟!
究竟個天要我要經過幾多考驗, 去証明我好錫我3隻豬仔?
 |
| 出廳set細圍欄收窄行動 |
後記:
隻衰豬剛食晚餐時企起身呀, 叫到嘈晒, 本來比琴日精神, 但可能咁又整親, 又喘氣:'(
唯有換咗個細籠等佢無得企, 嚴格執行困籠活動, 為咗你唔痛為大家好, 豆b你忍耐兩星期啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
