 |
| 相片連結 |
從加拿大回港嘅姐姐聽日離開香港喇, 上星期日晚一齊食farewell dinner; 今次番嚟係為咗見病重姐姐一面, 陪伴佢人生旅途最後一程; 嗰晚大家聚埋, 不勝唏噓, 經歷咗呢件事, 再聚首感覺有D恍如隔世!
雖然加拿大話遠唔遠, 但各散東西, 今日一別, 再會何期?
對一D經常穿梭各地嘅人, 見我咁講可能會笑死; 但我有3隻豬, 要放低佢哋出門係唔可以嘛!
前晚話題都有談及喪禮要點辦事, 還好大家都接受事實, 氣氛唔算太傷悲, 現實如此都要睇化喇!
今日出去幾個姐妹同各家人再聚聚, 捉緊可以相聚嘅日子, 太多變故無辦法預期, 點諗到係年紀最細嘅姐姐最早離去 :'(
今日天氣唔錯, 大家提議去行大潭水塘, 資料顯示路程行一個半鐘就可以, 但帶住我行, 多出一倍時間都唔止, 竟行咗4個半鐘, 呢次係我生平第一次行咁遠路, 小腿竟然抽筋咗幾次, 好瘀@@
一個人獨處時會諗起好多往事, 尤其係夜斕人靜時, 個腦好似風車咁轉到唔識停止; 幸好我有3隻豬, 日間巴巴閉閉好多嘢要處理!
唔好睇小呢3隻豬嘅本事, 有佢哋陪伴, 勝過千言萬語!
好早前訂購咗張地氈, 店家曾通知運送時出咗D事, 收貨要延遲, 近日太忙都差不多忘記, 今日終於到手喇, 要訂做嘅地氈, 主題唔使講一定係3隻豬啦 :)
雖然質量一般啦, 但見到係3隻豬我就點都滿意 ;)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
