 |
| 相片連結 |
姐姐終於喺兩日前於昏睡中離去, 佢係基督徒, 願上主引領佢, 天國永生!
呢段日子以來, 心情忐忑, 每聽到whatsapp嘅響聲, 個心就好難安定, 內心非常矛盾, 唔想同佢道別, 面對佢受苦又想佢早日主懷安息!
呢件事令我有新嘅體會, 以前會覺得做事有目標, 朝住目標進發, 堅持落去一定可行; 但原來任何事都要從兩面睇, 堅持未必一定係最好, 適當時候識放手更直得鼓勵!
一直都明白要珍惜眼前人, 但經過今次事件感受更深, 一次一次失去親愛嘅人, 親愛嘅狗狗, 從呢D慘痛經歷, 我新嘅得著係做人唔好太認真, 握得越緊, 受傷更深!
工人姐姐話呢個月來, 即使佢做錯好多, 我都無再話佢喎, 可能不經意中我已經將要求降低, 或者無心情同佢磨!
係! 生命如同浪花, 一起一歿, 轉瞬歸於平靜, 好似咩都無發生過; 我哋喺塵世只係過客, 一切無大不了啊!
生命流逝真係不由人控制, 我哋只可對目前擁有嘅一切好好珍惜!
之前會跑醫院, 依家一切已暫告一個段落, 一切好似回復正常, 只係內心深處, 有一角損傷, 仍血漬斑駁, 要小心避免觸碰再受傷!
日子仍要繼續過, 喺有生之年要為咗我愛嘅, 愛我嘅好好活著!
同日晚上, 突然傳嚟小狗BB離世, 呢個消息又嚇我一驚, BB媽媽一向對狗狗極度愛鍚, 佢嘅傷痛我完全可以領略!
失去心愛嘅狗狗等同失去兒女一樣, 無養狗狗嘅係好難想像!
呢日對我哋嚟講係黑暗嘅一日, 我哋同樣心傷, 就以下面嘅一張圖同BB媽媽分享!
今日天色都唔好, 早D帶3隻豬出去行, 近日雖然身心勞累, 但我都騰出時間, 盡量帶佢哋去玩, 同佢哋出去跑跑係忘憂嘅好方法!
3隻豬近日少咗黐住媽媽, 今日去完街番嚟坐低同佢哋清潔, 佢哋都爭住將個頭仔向我挨, 突然覺得好心痛啊!
祇係幾日無仔細梳理, 佢哋毛毛都有D打結啦, 養呢3隻豬真係少D時間都唔得呀!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
