 |
| 相片連結 |
天氣驟降, 凍咗好多, 松松氣管差係不爭嘅事實, 豆b係高危一族, 波波都較以前敏感, 對天氣轉涼, 我有D緊張!
3隻豬對天氣轉變反應好快, 達達即刻有鼻水啦, 嚇得我立刻同佢換番件厚嘅衫, 波波氣管都有D卡卡聲, 我擔心㗎, 佢身體未完全康復, 再冷親就慘啦; 豆b呢隻怕凍豬仔我直情買佢怕喇, 佢氣管最差!
其實話波波誇張咩, 又真係山外有山, 喺fb睇到一隻毛孩嘅事例, 真係笑死啊; 不過呢個係黑色笑話, 當時佢媽媽實擔心到死啦!
話說呢個毛孩又係好怕著衫, 一著咗衫又係唔郁㗎, 波波都仲會行幾步, 然後又坐低番, 但呢個小朋友仲誇張, 除咗便便同食飯, 可以一動不動足一個鐘㗎; 佢媽媽見咁樣又唯有係除衫啦, 大家咁樣都係正常做法!
媽媽同佢除咗衫就無再為意喇, 點知第二日就發覺呢隻毛孩行路好似硬硬哋咁, 下半身同條頸好明顯啦, 嚇得媽媽即帶佢去太平道睇急症; 急症醫生都以為佢係頸椎有事, 之後就約神經專科呂醫生, 為安全計建議照MRI.....
結果佢其實乜事都無, 只係成日唔郁同一姿態, 導致肌肉勞損, 所以硬咗軚!
睇完呢個事例, 我更加唔敢勉強個仔啦, 波波仲係超級麻煩, 好少事都反應好大, 如果有相同情況, 又唔敢莽下推斷係同一病例, 又要攪一大餐, 我死得啦!
所以琴晚無同波波著衫, 拎咗厚氈仔比3隻豬仔, 又調較好暖爐自己先敢瞓覺; 即使係咁, 我都一晚起身幾次, 又怕豆b瞓落地下, 凍死佢啦; 不過豆b真係最叻, 已經藏住自己喺被仔中間, 瞓得好熟喇, 波波同達達都瞓得幾好, 應該唔會凍親啦!
只係我自己就衰咗喇, 可能一晚起身幾次冷親啦, 今日猛打乞嚏流鼻水, 大傷風喇 :(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
