.jpg) |
| 最滿足係攬住3隻可愛嘅心肝寶貝豬:) |
又"老"咗一年囉, 哈哈!
以前都會怕老, 但年紀越大經歷越多, 想法就改變咗, 能夠老去係一種福份, 原來要自然咁老去, 都唔容易啊; 近日聽聞有朋友嘅friend年紀唔大突然走咗, 大家祝我青春常駐之餘, 依家我都唔再介意做老婆婆喇!
一早收到好多whatsapp向我道賀, 能夠有咁多人記起我嘅生日, 日子真係無枉過, 仲有遠在外地嘅姐妹, 姐姐仲越洋錄音為我唱生日歌, 我"生日快樂"啊!
多謝FD上嘅朋友, 好多謝大家嘅祝福, 或者呢度嘅朋友都係狗友, 除咗祝福我之餘, 都會加上祝福我嘅豬仔身體健康; 佢哋非常清楚呢3隻豬係我快樂嘅泉源, 佢哋身體健康, 我先會生活快樂 ;)
快樂原來唔係一個人嘅事, 係好多人和事串連起嚟 , 身邊嘅人和事都安好, 咁自己先會快樂; 當然, 仲要我3隻豬都身體健康, 唔使我牽腸掛肚, 咁我就感覺幸福囉!
早兩日已經同阿女、老公出咗去慶祝, 一齊食生日晚飯, 就住星期日大家放假, 阿女嘅生日只係同我相差3日, 96兩頭勾, 所以一齊慶祝算喇; 人大咗都唔著重做咩慶祝喇, 只要生活得開心就日日都快樂啦!
慶祝活動呢D花巧嘢以前會為阿女做, 又做佈景又開生日會, 依家佢已經長大, 有一大群朋友為佢攪party, 蛋糕都食咗幾個囉:)
但我會繼續呢個任務, 樂此不疲咁攪生日會, 但生日會嘅對像就換咗, 3隻豬仔係主角!
我自己嘛就簡簡單單算喇, 本來我都話唔使要birthday cake喇, 要減肥:) 但老公話點簡單都要買喎, 是但啦, 就由得佢簡簡單單買落樓下買個啦 :)
好感恩有健康嘅身體, 老公同阿女又"聽話", 3隻豬目前都在健康狀態; 幸福唔係必然, 我會好好祝緊每一個幸福嘅日子, 祝願大家都健康愉快!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
